अखबार नेपाल ट्रेन्डिङ

काठमाडौं: नेपालभित्र डाउनलिंक अनुमति लिएका विदेशी टेलिभिजनहरुले विज्ञापन प्रसारण गर्न पाउने छैनन् ।

लामो समयदेखि प्रतीक्षाको विषय बनेको विज्ञापनरहित ‘क्लिनफिड’ लागू भएको हो । क्लिनफिड उपलब्ध गराउन सक्ने अवस्थामा भने अहिले बन्द रहेका च्यानलहरुको प्रसारण हुँदै जानेछ ।

शुक्रबारबाट नेपालमा प्रसारण हुने विदेशी टेलिभिजन च्यानलमा क्लिनफिड लागू भएसँगै विज्ञापनरहित क्लिनफिडमा प्रसारण नगर्ने विदेशी च्यानलहरुको प्रसारण रोकिएका छन् ।

एक वर्षदेखि क्लिनफिड लागू हुने व्यवस्था ऐनमा रहेकाले २०७७ कात्तिक ७ गतेदेखि विदेशी च्यानलमा विज्ञापनरहित क्लिनफिड प्रसारण गर्नुपर्ने, विदेशी विज्ञापनलाई नेपालका सञ्चारमाध्यमले प्रसारण गर्दा डबिङ गरी प्रसारण गर्न नपाउने कानुनी व्यवस्था रहेको छ ।

२०७५ कात्तिक ८ गते राजपत्रमा प्रकाशित ऐनले क्लिनफिडमा जान सेवाप्रदायकहरूलाई एक वर्ष समय दिएको थियो । कोभिड-१९ महामारीका कारण समय नपुगेको भन्दै व्यवसायीहरुले छ महिना थप गर्न भन्दै सञ्चार मन्त्रालय समक्ष लिखित निवेदन नै पेस गरेका थिए ।

भारतीय ब्रोडकाष्टर्स फोरम, डिस्कभरी नेटवर्क्स, बीबीसी न्यूज, नेपाल केबल टेलिभिजन महासंघजस्ता संघ-संस्थाबाट क्लिनफिड प्रसारणको म्याद थप्न माग गरेपनि सरकारले अस्वीकार गरेको थियो ।

क्लिनफिड सहित च्यानल प्रसारण नभएमा कानुन बमोजिम कारबाही हुने मन्त्रालयले जनाएको छ । विदेशी च्यानलले क्लिनफिड उपलब्ध गराउन सक्ने अवस्थामा करिब १० दिनपछि केही टेलिभिजन हेर्न पाइने नेपाल केबल टेलिभिजन व्यवसायी महासंघले जनाएको छ ।

महासंघका अनुसार अहिले ३२ ओटा मात्रै विदेशी च्यानल प्रसारण हुँदैछन् । प्याकेजमा किनिने र सित्तैमा बजाउन पाइने गरी करिब १८० भन्दा बढी च्यानलको प्रसारण तत्कालका लागि बन्द भएको छ ।

भारतीय प्रशारकले नेपालमै क्लिनफिड गर्ने भएपछि अब विज्ञापनको समयमा स्क्रिन खाली देखिनेछ । क्लिनफिडको अनुगमनका लागि सञ्चार तथा सूचना प्रविधि मन्त्रालयले विज्ञापन बोर्ड पनि गठन गरेको छ ।

क्लिनफिड लागू भएसँगै करिब १२ अर्बको भनिएको विज्ञापन बजार हिस्सा ५० प्रतिशतले बढ्ने अनुमान गरिएको छ । २०७३ साल कात्तिक ६ गतेको मन्त्रिपरिषद्को बैठकले पारित गरेको क्लिनफिड नीति २०७४ साल साउन १ गतेबाट कार्यान्वयन हुनुपर्ने भएपनि विविध कारणले कार्यान्वयन हुन सकेको थिएन ।

क्लिनफिड लागु भएसँगै यसले देशको अर्थतन्त्रमा समेत फाइदा पुग्ने देखिएको छ । ठूलो संख्यामा प्राविधिक र कलाकारहरुले स्वदेशमै रोजगारी पाउनेछन् । विज्ञापन एजेन्सीहरुको सक्रियता थप बढ्नेछ ।