अखबार नेपाल ट्रेन्डिङ

बाँके : कोरोना संक्रमणका कारण मृत्यु हुनेको संख्या थपिदैछ । आज फेरी अस्पतालमा उपचाररत दुईजना कोरोना सङ्क्रमितको गएराति मृत्यु भएको छ ।

दाङको घोराही उपमहानगरपालिका वडा नंं ३ निवासी १५ वर्षीय किशोर र कोहलपुर नगरपालिका ९ पिपरी निवासी ३८ वर्षीय पुरुषको मृत्यु भएको स्वास्थ्य कार्यालयका कोरोना फोकल पर्सन नरेश श्रेष्ठले जानकारी दिएका छन् ।

उनका अनुसार दाङको घोराहीबाट उपचारका लागि शिक्षण अस्पताल कोहलपुरमा भर्ना भएका १५ वर्षीय किशोरको उपचारका क्रममा शुक्रबार राति करिब नौ बजे मृत्यु भएको हो । उनलाई निमोनियाबाट ग्रसितको अवस्था अनुसार गरिनुपर्ने सबै प्रकारको उपचार गर्दा पनि उपचार नभई मृत्यु हुन पुगेका हुन ।

त्यसैगरी कोहलपुर नगरपालिका ९ पिपरी निवासी ३८ वर्षीय पुरुषको नेपालगञ्जस्थित भेरी अस्पतालमा उपचारकै क्रममा गएराति ११ बजे मृत्यु भएको हो ।

थप दुइजनाको मृत्यु भएपछि बाँकेमा कोरोनाका कारण मृत्यु हुनेको संख्या २४ पुगेको छ । यस्तै बाहिरी जिल्लाबाट उपचारको क्रममा बाँके आई मृत्यु हुनेको सङ्ख्या १२ पुगेको श्रेष्ठले जानकारी दिएका छन् ।