अखबार नेपाल ट्रेन्डिङ

काठमाडौं: रातो मछिन्द्रनाथको रथ तानिरहँदा प्रहरीले हस्तक्षेप गरेपछि ललितपुरको पुल्चोक तनावग्रस्त बनेको छ ।

प्रहरी र स्थानीय युवाहरुबीच झडप हुँदा पुल्चोक तनावग्रस्त बनेको हो । रथ तानिरहेका बेला प्रहरीले रोकेपछि झडप भएको हो ।

प्रहरीले युवाहरुलाई रोक्दै पानीको फोहरा हान्न शुरु गरेपछि युवाहरुले ढुंगामुढा गरेका हुन् । झडप बढेपछि प्रहरीले अश्रुग्यास हानेर भीडलाई नियन्त्रणमा लिने प्रयास गरिरहेको छ ।

सीडीओले भने- रातो मछिन्द्रनाथ रथयात्रा रोक्छौं
यसैबीच ललितपुर जिल्ला प्रशासन कार्यालयले निषेधाज्ञाकाबीच सुरु भएको रातो मछिन्द्रनाथको रथयात्रा रोक्ने बताएको छ ।

बिहीबार बिहानदेखि युवाहरूले स्वतस्फूर्त रूपमा सुरु गरेको रथयात्रालाई तितरबितर बनाउने तयारी भएको जिल्ला प्रशासन कार्यालय ललितपुरका प्रमुख जिल्ला अधिकारी नारायणप्रसाद भट्टले बताए ।

उनले भने ‘रथयात्रा, जात्रापर्व जस्तो धेरै मान्छे भेला हुने पर्व निषेध गरेकोले रथयात्रा हुन सक्दैन । हामी भिडलाई तितरबितर बनाउने तयारीमा छौं ।’ ललितपुरमा बिहीबारदेखि निषेधाज्ञा तेस्रो सातामा प्रवेश गरेको छ ।

गत असार १० गते बनाइएको रातो मछिन्द्रनाथको रथारोहण भइसकेपछि पनि रथयात्रा भने रोकिएको थियो ।