अखबार नेपाल ट्रेन्डिङ

काठमाडौं: नेपाली सेनासम्बन्धी सही र तथ्य सूचना सम्प्रेषण गर्ने ध्येयका साथ वि.सं. २०५८ साल चैत २० गते स्थापना भएको सैनिक जनसम्पर्क तथा सूचना निर्देशनालयले २४ औं वार्षिकोत्सव मनाएको छ । प्रधानसेनापति अशोकराज सिग्देलको प्रमुख आतिथ्यतामा सैनिक मुख्यालयमा आयोजित कार्यक्रममा सैनिक जनसम्पर्क तथा सूचना निर्देशनालयका निर्देशक एवम् सैनिक प्रवक्ता सहायकरथी राजाराम बस्नेतले निर्देशनालयले नागरिकको सूचना पाउने अधिकारको सम्मान गर्दै नागरिक-सेना र सञ्चार जगतबीच पुलका रुपमा काम गरिरहेको उल्लेख गरे ।

‘आमजनतालाई सु-सूचित गर्दै चेतनशील समाज निर्माणका लागि खबरदारी गर्ने सञ्चार जगत र देशको सार्वभौमसत्ता, भौगोलिक अखण्डता र राष्ट्रिय सुरक्षाको जिम्मेवारीमा रहेको नेपाली सेनाको कार्य प्रकृति फरक रहेता पनि राष्ट्रिय हित र एकता दुवैको सर्वोपरी लक्ष्य हो’ सैनिक प्रवक्ता सहायकरथी बस्नेतले भने-    ‘नेपाली सेना र सञ्चार जगतले हरेक तहमा साझेदारी र सहकार्य गर्दै राष्ट्रिय सुरक्षासँग संवेदनशील सूचनाको व्यवस्थापन र पारदर्शीताका साथ सन्तुलन कायम गर्न जरुरी देखिएको छ ।’

सैनिक जनसम्पर्क तथा सूचना निर्देशनालयले स्थापनाको २४ वर्षमा विभिन्न स्थानमा रक्षा समाचारदाताका लागि अभिमुखीकरण सञ्चालन गरेको थियो । हालसम्म ६ सय ८३ जना सञ्चारकर्मीले उक्त कार्यक्रममा सहभागिता जनाइसकेका छन् । कार्यक्रममा प्रधानसेनापति अशोकराज सिग्देलले वि.सं. २०८२ को लघु चलचित्र प्रतियोगिताका तीन उत्कृष्ट चलचित्र निर्मातालाई पुरस्कार प्रदान गरेका थिए । सैनिक जनसम्पर्क तथा सूचना निर्देशनालय स्थापनाको २४ औं वार्षिकोत्सवका अवसरमा लघु चलचित्र बुख्याँचाका सुरज पराजुली, अमर कर्तव्यका देवशङ्कर पौडेल र अडानका निर्माता राम नरेशलाई प्रधानसेनापतिले नगद पुरस्कार र प्रमाणपत्र प्रदान गरेका हुन् ।

प्रतियोगितामा लघु चलचित्र बुख्याँचा प्रथम, अमर कर्तव्य द्वितीय र अडान तृतीय घोषित भई क्रमशः दुई लाख, एक लाख ५० हजार र एक लाख रुपैयाँ नगद पुरस्कार र प्रमाणपत्र प्राप्त गरेका छन् । नेपाली सेनाले निर्देशनालय स्थापना दिवसका अवसरमा राष्ट्रिय विकास, विपद् व्यस्थापन, प्रकृति तथा पर्यावरण संरक्षण, राष्ट्रिय एकताको प्रवर्द्धन र अन्तर्राष्ट्रिय शान्ति कार्यमा पुर्याएको योगदानसम्बन्धी विषयमा लघु चलचित्र निर्माण गर्न आह्वान गरेको थियो । प्रतियोगिताका लागि ३४ वटा निवेदन परेकामा १० वटा स्क्रिप्ट छनौट गरी चलचित्र निर्माणका लागि सेनाले आवश्यक सहयोग र सहजीकरण गरेकामा ती तीन चलचित्र छनौट भएका थिए ।

कार्यक्रममा महाशिवरात्रि तथा सेना दिवस २०८२ का अवसरमा आयोजित नेपाली सेना फोटो प्रदर्शनीका उत्कृष्ट युनिट तथा निर्देशनालयलाई समेत पुरस्कृत गरिएको थियो । प्रतियोगितामा शार्दुलजङ्ग गुल्म प्रथम, सैनिक कल्याणकारी निर्देशनालय द्वितीय र प्रतिविद्रोह तथा जङ्गल शिक्षालय तृतीय घोषित भएका थिए । प्रधानसेनापति सिग्देलले कार्यक्रममा नेपाली सेनाद्वारा प्रकाशित सिपाही वार्षिक २०८२ मा प्रकाशित उत्कृष्ट तीन लेखका सर्जक चन्द्रदेव भट्ट, सहायकरथी दिलविक्रम सुब्बा र महासेनानी ईश्वर बुढाथोकीलाई नगद पुरस्कार र प्रमाणपत्र प्रदान गरेका थिए ।