अखबार नेपाल ट्रेन्डिङ

सन् २००७ को फिफा ‘प्लेयर अफ द इयर’ अवार्ड ब्राजिलका काकाले उपाधि जितेका थिए । सोही मञ्चमा भएको एउटा रोचक घटनाले एउटा नयाँ युगको सुरुवातको संकेत दियो । युवा खेलाडी लिओनल मेसी र क्रिस्टियानो रोनाल्डो क्रमशः दोस्रो र तेस्रो भएका थिए । तर, फुटबलका महान् खेलाडी पेलेले झुक्किएर दोस्रो स्थानको ट्रफी रोनाल्डोलाई दिए । फिफा अध्यक्षले बीचमा परेर उनीहरूलाई ट्रफी साट्न लगाउनुपर्यो । त्यतिबेला यी दुई युवाको अनुहारमा देखिएको गम्भीरताले भविष्यको ठूलो प्रतिस्पर्धाको झल्को दिन्थ्यो । त्यसपछिको १० वर्षसम्म अर्जेन्टिनाका मेसी र पोर्चुगलका रोनाल्डोबाहेक अरू कसैले पनि विश्वकै उत्कृष्ट खेलाडीको अवार्ड जित्न सकेनन् ।

सन् २००७ यता दिइएका २९ वटा मुख्य अवार्डमध्ये २० वटा त यी दुईले नै बाँडेका छन् । यी दुईले मिलेर झन्डै दुई हजार गोल गरेका छन् र क्लब तथा देशका लागि ८५ वटा ट्रफी जितेका छन् । अर्जेन्टिनाका एन्जल डी मारिया भन्छन्, ‘मलाई लाग्दैन कि फुटबलको इतिहासमा यस्तो प्रतिस्पर्धा फेरि कहिल्यै देखिनेछ ।’

फरक स्वभाव, उस्तै संघर्ष

यी दुईलाई एकअर्काको विपरीत मानिन्छ । मेसी ड्रिब्लिङमा माहिर र लजालु स्वभावका छन् भने रोनाल्डो शारीरिक रूपमा शक्तिशाली देखिन्छन् । तर, उनीहरूको संघर्षको कथा उस्तै छ । दुवै गरिव परिवारमा जन्मिएका थिए र आफ्नो सपना पूरा गर्न सानै उमेरमा घर छाडेर हिँडेका थिए त्यतिबेला मेसी १३ वर्ष र रोनाल्डो १२ वर्षका थिए ।

स्पेनको त्यो सुनौलो युग

सन् २००९ मा रोनाल्डो रियल मड्रिड गएपछि यो प्रतिद्वन्द्विताले उत्कर्ष रूप लियो । स्पेनमा बिताएका ९ सिजनमा रोनाल्डोले ४३८ खेलमा ४५० गोल गरे भने मेसीले ४७६ खेलमा ४७१ गोल गरे । उनीहरू एकअर्कालाई जित्नकै लागि हरेक खेलमा ज्यान दिएर खेल्थे । मैदानमा गरेको ‘जर्सी सेलिब्रेसन’ देखि सामाजिक सञ्जालमा हुने फ्यानहरूको बहससम्म, सबै कुराले फुटबललाई पहिलेभन्दा धेरै लोकप्रिय बनायो ।

मैदान बाहिरको क्रेज

आज मेसी र रोनाल्डो केवल खेलाडी मात्र होइनन्, उनीहरू एउटा ठूलो ब्राण्ड हुन् । इन्स्टाग्राममा रोनाल्डोका ७० करोड र मेसीका ५० करोड फलोअर्स छन् । रोनाल्डो विश्वकै सबैभन्दा धेरै कमाउने खेलाडी हुन् (३०० मिलियन डलर), मेसी तेस्रो स्थानमा छन् (१४० मिलियन डलर) । २०२२ को विश्वकपअघि उनीहरूले लुइ भिटनको सुटकेसमा चेस खेलिरहेको तस्बिरले इन्टरनेटमा सबै रेकर्ड तोडेको थियो ।

धेरैका लागि यो बहस कहिल्यै सकिने छैन । रोनाल्डोलाई फुटबल इतिहासकै ‘महान् गोल मेसिन’ मानिन्छ भने मेसीलाई ‘महान् खेलाडी’ । मेसीले विश्वकप जितेपछि धेरैले यो बहस सकिएको र मेसी नै इतिहासकै सर्वोत्कृष्ट भएको मान्छन् । यो कथा अझै सकिएको छैन । सन् २०२६ को विश्वकपमा यदि अर्जेन्टिना र पोर्चुगलको भेट भयो भने, यो महान् प्रतिद्वन्द्विताको अन्तिम र सबैभन्दा रोमाञ्चक अध्याय त्यहीँ लेखिनेछ ।