अखबार नेपाल ट्रेन्डिङ

काठमाडौं:  प्रधानमन्त्री केपी शर्मा ओलीले विपद पीडितको उद्धार, राहत र जनधनको रक्षाका लागि कुनै कसर बाँकी नराख्न मातहतका निकायलाई निर्देशन दिएका छन् ।

प्रधानमन्त्री निवास बालुवाटारमा बसेको राष्ट्रिय विपद जोखिम न्यूनिकरण तथा व्यवस्थापन परिषदको बैठकमा प्रधानमन्त्री ओलीले लगातारको वर्षासँगै देशका विभिन्न स्थानमा बाढी तथा पहिरोका कारण जनधनको क्षति कम गर्न तथा तत्काल उद्धार तथा राहतको व्यवस्थापन गर्न  सम्बन्धित निकायका पदाधिकारीहरुलाई निर्देशन दिएका हुन् ।

देशभर भारी वर्षाका कारण बाढी–पहिरो आउने र अब दिनमा आउन सक्ने महामारी तथा सर्पजन्य समस्यासँग जुध्न तथा जनधनको रक्षा गर्नका साथै जोखिम कम गर्ने उपाय, उद्धार तथा राहत एवम् पुनर्स्थापना कार्यमा हेलिकोप्टरको प्रयोग तथा हेलिकप्टर जान प्रतिकुल रहेको अवस्थामा सम्भावित अरु प्रविधिको खोजी तथा प्रयोग गर्न सम्बन्धित मन्त्रालय तथा निकायहरुलाई निर्देशन दिएका छन् ।

यस्तै प्रधानमन्त्री ओलीले उद्धार, राहत तथा पुनर्स्थापनाको काममा बजेट अभाव भएमा तत्काल थप बजेटको व्यवस्था गर्न अर्थमन्त्री डा. युवराज खतिवडालाई निर्देशन दिएका छन् । म्याग्दीमा पहिरोका कारण भत्किएको पुल दुई हप्ताभित्र बनाइसक्ने र भत्किएका बाटोहरु तत्काल मर्मत गर्न सम्बन्धित निकायलाई समेत निर्देशन दिएका छन् ।