अखबार नेपाल ट्रेन्डिङ

एजेन्सीः विश्व स्वास्थ्य संगठन (डब्ल्यूएचओ) का महासचिव डा. ट्रेडोस अधोनम घेब्रेससले कोरोना महामारीको सबैभन्दा खराब अवस्था आउन बाँकी रहेको बताएका छन् । कोरोना भाइरसका कारण विश्वभर एक करोडभन्दा धेरै मानिसमा संक्रमण भइसकेको छ भने पाँच लाख चार हजारभन्दा बढीको मृत्यु भएको छ ।

महामारीका कारण विश्वभरको अर्थव्यवस्था र सामाजिक जनजीवनमा निकै असर परेको छ । यति धेरै मानवीय र आर्थिक/सामाजिक क्षति भइसक्दा पनि महामारीको सबैभन्दा खराब स्थिति आउन बाँकी नै रहेको डा. टेड्रोसले बताएका हुन् । उनले भनेका छन्, ‘यो महामारी चाँडै अन्त्य होस् भन्ने चाहन्छौं, तर सत्य यो हो कि हामी अझै यो महामारी अन्त्य हुने विन्दुबाट धेरै टाढा छौं ।

केही देशले नियन्त्रणमा लिएजस्तो देखिएपनि विश्वभर यो समस्या कायमै छ । राष्ट्रिय र विश्वव्यापी एकतामा कमी देखिएकाले भाइरस फैलन मद्दत मिलिरहेको छ, त्यसैले खराब समय आउन बाँकी नै छ ।’ यदि विश्वभरका सरकारले महामारी नियन्त्रणका लागि सही नीतिहरु पालना गरेनन् भने यसले अरु धेरै मानिसलाई संक्रमित बनाउन सक्ने उनले बताएका छन् ।

महामारी नियन्त्रणका लागि जर्मनी, दक्षिण कोरिया र जापानले झैं काम गर्न टेड्रोसले आग्रह गरेका छन् । बेलायतले लकडाउनका बेला पालना गर्नुपर्ने नियमलाई झन् कडा बनाएको छ । लेस्टर शहरमा कोरोना भाइरस संक्रमित थपिँदै गएपछि लकडाउनमा कडाई गरेको हो । संयुक्त अरब इमिरेट्स (युएई) ले जुलाई १ तारिखदेखि धार्मिकस्थल खुला गर्ने भएको छ । त्यहाँको सरकारले सबै मस्जिद र अन्य धार्मिकस्थल खोल्ने घोषणा गरेको हो ।

हालसम्म युएईमा ४८ हजार २ सय ४६ जना संक्रमित भेटिएका छन् । संक्रमितमध्ये ३ सय १४ जनाको ज्यान गएको छ । महामारीबाट सबैभन्दा धेरै प्रभावित अमेरिकामा अहिलेसम्म २५ लाख ८६ हजार ८ सय ४४ संक्रमित फेला परेका छन् । यी मध्ये एक लाख २६ हजार १ सय २७ जनाले ज्यान गुमाइसकेका छन् ।

अमेरिकापछि सबैभन्दा बढी प्रभावित ब्राजिलमा १३ लाख ६८ हजार १ सय ९५ जना संक्रमित भेटिएका छन् । त्यहाँ ५८ हजार ३ सय १४ जना संक्रमितको ज्यान गएको छ । नेपालको दक्षिणी छिमेकी देश भारतमा हालसम्म पाँच लाख ४८ हजार ३ सय १८ जना संक्रमित फेला परेका छन् भने १६ हजार ४ सय ७५ जनाको ज्यान गइसकेको छ । भारत यतिखेर कोरोना महामारीबाट अति-प्रभावित मुलुकको सूचीको चौथो स्थानमा छ ।