अखबार नेपाल ट्रेन्डिङ

एजेन्सीः बायर्न म्युनिखले जर्मन बुन्डेसलिगा च्याम्पियन फराकिलो जितसँगै सिजनको अन्त्य गरेको छ । सिजनको अन्तिम खेलमा शनिबार राति भएको वुल्फ्सबर्गको घरेलु मैदानमा बायर्नले १० खेलाडीमा सिमित वोल्फ्सबर्गलाई ४-० गोल अन्तरले पराजित गरेको हो ।

जितसँगै वायर्नले बुन्डेसलिगाको उपाधि ट्रफि उचालेको छ । यो वायर्नको लगातार ८औं बुन्डेसलिगा उपाधि समेत हो । उसको ३४ खेलमा ८२ अंक रह्यो भने हारको सामना गरेको वुल्फ्सबर्गको छैठौ स्थानमा रहँदै युरोपा लिग खेल्ने आकांक्षा तुहिएको छ । उसले ३४ खेलमा ४९ अंक जोड्दै सातौ स्थानमा सिजन टुङ्गयाएको छ ।

यस्तै सिजनको उत्कृष्ट खेलाडी समेत घोषित भएका रोबर्ट लेवान्डास्किले यस सिजन ३४ गोल गर्दै सर्वाधिक गोलकर्ताको पुरस्कार समेत हात पारेका छन् । यसबाहेक वेर्डर ब्रिमेन, कोर्टुना डुसेलडोर्फ र पेडरबर्न बुन्डेसलिगको शिर्ष डिभिजनबाट दोश्रो डिभिजनमा रेलिगेट भएको छ ।

दुई खेल अगाबै च्याम्पियन बनिसकेको बायर्नलाई जित दिलाउन किङ्सले कोम्यान, माइकल कुइसान, रोबर्ट लेवान्डोस्की र थोमर मुलरले एक एक गोल गरे । खेलको चौंथो मिनेटमा कोम्यानको गोलबाट बायर्नले सुरुवाती अग्रता बनाएको थियो । ३७औं मिनेटमा माइकलले गोल गर्दा पहिलो हाफमा बायर्न २-० ले अघि रह्यो ।

खेलको ७१ औं मिनेटमा जोसुवाले रातो कार्ड खादै मैदानबाट बाहिरिदा घरेलु टिम १० खेलाडीमा समेटियो । माइकललाई पेनाल्टी क्षेत्रमा लडाएपछि उनलाई रेफ्रीले रातो कार्ड र बायर्नलाई पेनाल्टीको मौका दिएका थिए ।

उक्त पेनाल्टीमा लेवान्डोस्कीले गोल गर्दै टोलीलाई ३-० को अग्रता दिलाए । उनको यो लिगमा सिजनको ३४ औं गोल समेत हो । उनी यस सिजनको लिगमा सर्वाधिक गोलकर्ता हुन् । त्यसपछि खेलको ७९ औं मिनेटमा मुलरले गोल गर्दै बायर्नलाई ४-० को जित दिलाए ।

वोल्फ्सबर्गको घरेलु मैदानमा फराकिलो जितसँगै बायर्नले लगातार आठौं सिजन उपाधि ट्रफी उचालेको छ । बायर्नको यो कीर्तिमानी ३० औं बुन्डेसलिगा उपाधि समेत हो ।