अखबार नेपाल ट्रेन्डिङ

काठमाडौ: स्वास्थ्य तथा जनसङ्ख्या मन्त्रालयले कोभिड-१९ को कारणले स्थगित राष्ट्रिय भिटामिन ‘ए’ कार्यक्रम पुनः सञ्चालन गर्ने भएको छ । गत चैत २१ र बैशाख ६ र ७ गते तय गरिएको सो कार्यक्रम कोरोना महामारी कारण देशभर लकडाउन भएपछि मन्त्रालयले उक्त कार्यक्रम स्थगित गरेको थियो ।

स्थिगित राष्ट्रिय भिटामिन ‘ए’ कार्यक्रम देशभर लकडाउन खुकुलो भएपछि नेपाल सरकारले यहि असार २२ र २३ गते पुन सञ्चालन गर्ने स्वास्थ्य सेवा विभागले जनाएको छ । दोस्रो चरणको कार्यक्रम अन्तर्गत ६ महिनादेखि ५९ महिना सम्मका २७ लाख ३ हजार ५ सय २२ बालबालिकालाई भिटमिन ‘ए’ खुवाउने र एक वर्षदेखि ५ वर्षसम्मका २३ लाख ९३ हजार एक सय ५२ बालबालिकालाई जुकाको औषधि खुवाउने तयारी गरेको छ । कार्यक्रम अन्तर्गत ४१ जिल्लाका ६ महिनादेखि २३ महिनासम्मका बालबालिकालाई बालभिटा वितरण गरिने पोषण शाखा प्रमुख केदारप्रसाद पराजुलीले जानकारी दिए ।

यसअघि राष्ट्रिय भिटामिन ‘ए’ कार्यक्रमको पहिलो चरण गत कात्तिक २ र ३ मा सञ्चालन भएको थियो । उक्त कार्यक्रम मार्फत पहिलो चरणमा ६ देखि ५९ महिनाका बालबालिकालाई भिटामिन ‘ए’ क्याप्सुल र एकदेखि ५ वर्षसम्मका बालबालिकालाई जुकाको औषधि उपलब्ध गराइएको थियो भने ६ देखि २३ महिनाका बालबालिकाभलाई बहुसूक्ष्म पोषक तत्व बालभिटा वितरण गरिएको थियो ।