अखबार नेपाल ट्रेन्डिङ

एजेन्सी: कोरोना भाइरसविरुद्धको नयाँ खोपको मानवीय परीक्षण बेलायतमा सुरू भएको छ । स्वस्फूर्त रुपमा खोपको परीक्षणमा सहभागी व्यक्तिलाई नयाँ खोपको डोज दिने प्रक्रिया थालिएको वैज्ञानिकहरुले जनाएका छन् ।

इम्पेरियल कलेज लण्डनका प्राध्यापक रोबिन शाट्टोक र उनका सहकर्मीहरूको नेतृत्वमा परीक्षण सुरू भएको हो । झण्डै तीन सय जनालाई आउँदा हप्ताहरूमा कोरोना भाइरसविरुद्धको सम्भावित खोप दिइने र परीक्षणमा सहभागी हुने व्यक्तिहरूलाई हाल ‘इम्युनाइज्ड्’ गर्न थालिएको हो । पहिलो चरणको परीक्षणको रिपोर्ट आएपछि यो खोपको दोस्रो चरणको मानवीय परीक्षण आउँदो अक्टोबरमा सुरू र दोस्रो चरणको परीक्षणमा ६ हजार मानिस सहभागी हुने छन् । इम्पेरियल कलेजका वैज्ञानिकहरूले अहिले परीक्षणमा रहेको खोप आउँदो वर्ष सन् २०२१ को सुरूमा बेलायत तथा विश्वका अन्य देशमा वितरण गर्न सकिने बताएका छन् ।

अक्सफोर्ड विश्वविद्यालयका वैज्ञानिकहरूले तयार पारिरहेको खोपको मानवीय परीक्षण यसअघि नै सुरू भई तेस्रो चरणको मानवीय परीक्षणको तयारी हुँदैछ । अहिलेसम्ममा विश्वभर कोरोना भाइरसविरुद्धका खोप बनाउनका लागि वैज्ञानिक तथा अनुसन्धान संस्थाहरू जुटेका छन् भने सम्भावित १२० खोपमा काम भइरहेको जनाईएको छ ।