अखबार नेपाल ट्रेन्डिङ

एजेन्सीः इंग्लिस प्रिमियर लिग फुटबलमा म्यानचेस्टर युनाइटेडले सहज जित निकालेको छ । बुधबार राति भएको खेलमा युनाइटेडले सेफिल्ड युनाइटेडलाई ३-० गोल अन्तरले पराजित गरेको हो ।

ओल्ड ट्राफोर्डमा युनाइटेडलाई जित दिलाउन एन्थोनी मार्सियलले ह्याट्रिक गरे । खेलको सातौं मिनेटमा मार्सियलले गोल गर्दै घरेलु टोलीलाई अग्रता दिलाएका थिए । ४४ औं मिनेटमा मार्सियलले व्यक्तिगत दोस्रो गोल गर्दा पहिलो हाफमा युनाइटेड २-० ले अघि रह्यो ।

खेलको ७४औं मिनेटमा मार्सियलले ह्याट्रिक पुरा गर्दै युनाइटेडलाई सहज जित दिलाए । सेफिल्डमाथिको जितसँगै युनाइटेडले ३१ खेलमा ४९ अंक जोडेको छ । युनाइटेड लिगको पाँचौं स्थानमा छ भने सेफिल्ड ४४ अंक जोडेर आठौं स्थानमा छ ।

प्रिमियर लिग अन्तर्गतको अर्को खेलमा एभर्टनले नर्विच सिटीलाई १-० गोल अन्तरले पराजित गरेको छ । यस्तै वुल्भ्सले बर्नेमाउथलाई १-० ले नै हराएको छ । न्युकासल युनाइटेड र एस्टन भिल्लाले भने १-१ गोलको बराबरी खेल्दै अंक बाडेका छन् ।