अखबार नेपाल ट्रेन्डिङ

काठमाडौं: गैर आवासीय नेपाली संघ (एनआरएनए) ले विदेशमा अलपत्र परेका ५ सयभन्दा बढी नेपालीको उद्धार गरिएको जनाएको छ । हिजो मात्र कुवेत सरकारको सहयोगमा २ सय ९९ नेपाली स्वदेश फर्किएका छन् ।

गैर आवासीय नेपाली संघका अध्यक्ष कुमार पन्तका अनुसार कुवेतको घर फिर्ती शिविरमा थप दुई हजार ९ सय ९१ जनालाई हरेक दिन दुई उडान गरी फर्काउने तयारी भएको छ । गैर आवासीय नेपाली संघ कुवेत र नेपाली दूतावासको समन्वयमा उनीहरुलाई नेपाल फर्किन सहयोग गरिएको थियो । अहिलेसम्म म्यानमारबाट २६, खाडी मुलुक दुबईबाट १ सय ६८, अष्ट्रेलियाबाट ११, जापानबाट सात र कुवेतबाट २ सय ९९ गरी पछिल्लो समय ५ सय ११ जनालाई उद्धार गरिसकिएको संघले जनाएको छ ।

विभिन्न मुलुकबाट कूल ५० हजार ९३ जनाले निवेदन दिएकामा प्राथमिकताका आधारमा परराष्ट्र मन्त्रालयले चार्टर्ड विमानमार्फत २४ हजार १ सय ४८ जनालाई मात्र फिर्ता ल्याउन सिफारिस गरेको छ । कोरोनाको प्रभावका कारणले मलेशिया र खाडी देशमा मात्र करिब २० हजार नेपाली पहिलो चरणमा उद्धारको पर्खाइमा छन् ।