अखबार नेपाल ट्रेन्डिङ

काठमाडौं: प्रधानमन्त्री केपी शर्मा ओलीले भारतले अतिक्रमण गरेको नेपाली भूमि फिर्ता गर्न नेपाल सफल हुने बताएका छन् । नेपाल सरकारको आगामी आर्थिक वर्षको नीति तथा कार्यक्रममाथिको छलफलमा प्रतिनिधिसभामा आज जवाफ दिँदै प्रधानमन्त्री ओलीले सरकारले नेपालको नयाँ राजनीतिक नक्सा तयार गरेसँगै यसले नेपालको मानचित्रमा परिवर्तन आएको उल्लेख गरे ।

प्रधानमन्त्री ओलीले लिम्पियाधुरा सहितको नेपाली नक्शा नेपाली भूमि फिर्ता ल्याउनकै लागि जारी गरिएको पनि बताए । सरकारले लिम्पियाधुरा सहितको नक्शा देखाउनका लागि मात्र जारी नगरिएको भन्दै उनले भने, ‘यो कुनै तमासा गरिएको होइन, देखाउनका लागि मात्र गरिएको होइन । यथार्थमा फिर्ता ल्याउनका लागि गरिएको हो ।’

प्रधानमन्त्रीले ओलीले भने, ‘तथाकथित राष्ट्रवाद बोल्ने अभ्यास र प्रचलन देखिआएको भोगिआएको समयमा त्यस्तो आकलन गर्नु पनि अनौठो होइन ।’ नक्शा सार्वजनिक भएसँग संविधानको अनुसूचीको व्यवस्था पनि फेरिनुपर्ने भएकाले उक्त व्यवस्था संशोधन गर्न सरकारले संसदमा संविधान संशोधनको प्रस्ताव ल्याउने भन्दै पारितका लागि संसदलाई आग्रह पनि गरे ।

प्रधानमन्त्री ओलीले भारतसँग कुरा गरेर हाम्रो कूटनीतिक वार्ताका माध्यमबाट भूमि फिर्ता गराउने बताएका छन् । मन्त्रिपरिषद्को बैठकले पास गरेको नेपालको नयाँ नक्सालाई सरकारी छाप, निशान र पाठ्यक्रम आदिमा परिवर्तन हुने पनि उनले स्पष्ट गरे ।