अखबार नेपाल ट्रेन्डिङ

वैशाखः रोल्पाको त्रिवेणी गाउँपालिका वडा नम्बर ७ स्थित गैरीगाउँ भन्ने स्थानमा बिहीबार साँझ बम विस्फोट हुँदा ४ जना बालबालिकाको घटनास्थलमै मृत्यु भएको छ । मृत्यु हुने बालबालिकामा १४ वर्षीय नोखिराम डाँगी, १४ वर्षीय गौरव नेपाली, ११ वर्षीय विमला खत्री र ५ वर्षीय विजय खत्रीको मृत्यु भएको छ ।

गाउँको नजिकैको जंगलमा बाख्रा चराउन गएका बेला उनीहरुले बम फेला पारेर चलाउँदा विष्फोटमा परेर मृत्यु भएको हो । जिल्ला प्रहरी प्रमुख प्रहरी नायव उपरीक्षक चित्रबहादुर गुरुङका अनुसार चारै जनाको शब क्षतविक्षत अवस्थामा घटनास्थलमै मृत्यु भएको जनाएका छन् । विष्फोटको ठूलो आवाज आएपछि गाउँले घटनास्थल पुगेका थिए । युद्धकालमा रहेको बम विष्फोट भएको हुनसक्ने प्रहरीले अनुमान गरेको छ ।

चारै जनाको मृत्यु भएकाले विष्फोटको घटना कसरी भयो भन्ने बारे खुल्न सकेको छैन् । बम भेटाएर खेलाउदा विष्फोट भएको हो कि भन्ने आशंका गरिएको छ । घटनास्थलमा अर्को एक थान बम समेत फेला परेको छ । तत्कालीन विद्रोही नेकपा माओवादी र शाही नेपाली सेनाबीच युद्धताका दुम्ला जंगलमा भिडन्त समेत भएको थियो । युद्धकै बेला छाडिएको वेवारिसे बम विष्फोट भएको आशंका गरिएको छ ।