अखबार नेपाल ट्रेन्डिङ

काठमाडौं: टिचिङ अस्पतालबाट सेवा निवृत्त भएसँगै कर्णालीका दुर्गम क्षेत्रमा नि:शुल्क उपचार गर्दै हिँडेका डा. गोविन्द केसीले जुम्लामा प्रहरी घेराबन्दीमा परेका छन् ।

वरिष्ठ चिकित्सक केसीले आफु बसेको होटल बाहिर प्रहरी तैनाथ रहेको र दिनभरि अस्पताल जान प्रहरीले रोकेको बताका छन् । उनले एउटा स्वास्थ्यकर्मी स्वास्थ्यको प्रोटोकल पालना गरेर निस्कन खोज्दा प्रहरी-प्रशासनलाई किन टाउको दुखाइ भनि प्रश्न गरेका छन् ।

चिकित्सा शिक्षा सुधार अभियन्ता केसी दुई वर्षअघि जुम्ला गएर अनसन बसेका थिए । सरकारले जुम्लामा कर्णाली स्वास्थ्य विज्ञान प्रतिष्ठान स्थापना गर्ने, एमबिबिएस र डिग्रीको पढाइ सुरू गर्ने सम्झौता गरेको थियो ।

डा. केसीले उक्त सम्झौता पालनाका निम्ति दबाब दिन साउन ११ गतेबाट नयाँ चरणको सत्याग्रह सुरू गर्ने निधो गरेसँगै ९ गते जुम्ला प्रस्थान गरेका थिए ।

देशभरि कोरोना महामारी फैलिएकाले सत्याग्रह बस्ने समय बढाउँदै उनी ११ गते कालिकोट गएर केही समय बिरामीको उपचार गरेका थिए ।

त्यसपछि डोल्पा गएर त्यहाँको जिल्ला अस्पतालमा एक साता काम गरि मुगु प्रस्थान गरेका थिए ।

डा. केसीले तीन जिल्ला घुमेर फर्किंदासम्म सरकारले माग पूरा नगरेकाले साउन ३२ गते उनले १० दिनको अल्टिमेटम दिएका थिए ।

डा. गोविन्द केसीका मागहरु

• कर्णाली स्वास्थ्य विज्ञान प्रतिष्ठानमा एमबिबिएस लगायत कार्यक्रम सञ्चालन र स्नातकोत्तर तहको अनुमति, गेटा मेडिकल कलेज र राप्ती स्वास्थ्य विज्ञान प्रतिष्ठानमा पठनपाठन सुरू ।
• प्रदेश नम्बर दुई र गण्डकी प्रदेश तथा डोटी वा डडेल्धुरा, उदयपुर र इलाम वा पाँचथरमा सरकारी मेडिकल कलेज खोल्ने प्रक्रिया अघि बढाइयोस् ।
• त्यस्तै, २०७५ साउन १० गते भएको सम्झौताअनुसार चिकित्सा शिक्षा ऐनमा संशोधन गरियोस्, चिकित्सा शिक्षा नियमावली सच्याउँदै स्नातकोत्तर तहमा खुलातर्फ ७० प्रतिशत सिट कायम गरियोस् ।
• चिकित्साशास्त्र अध्ययन संस्थानमा वरिष्ठता मिचेर भएको नियुक्ति सच्याउँदै सबै पदमा वरिष्ठताका आधारमा नियुक्ति गरियोस्, विश्वविद्यालय, काउन्सिल र प्रतिस्ठानहरूमा पदाधिकारी नियुक्तिका लागि पदाधिकारी मापदण्ड निर्धारण समितिले दिएको सुझावअनुरूप कानुनी व्यवस्था गरियोस् ।
• बयलपाटा अस्पताललाई नियमित बजेटको व्यवस्था गरी दिगो नि:शुल्क सेवा सुनिश्चित गरियोस् ।