रामेछाप: रामेछाप जिल्लाको उमाकुण्ड गाउँपालिका-२ बाम्ती भण्डारको लहरे टोलको एक घरमा आइतबार मध्य रातमा आगलागी हुँदा एकै परिवारका दुई जनाको मृत्यु भएको छ ।

मृत्यु हुनेमा ७८ बर्षका धनबहादुर कार्की र उनकी श्रीमती ६८ बर्षकी सीता कार्की रहेका छन् ।

आइतबार राति स्थानीय मनोहर कार्कीको घरमा अचानक आगलागी हुँदा उनका बुबा र आमाको जलेर मृत्यु भएको जिल्ला प्रहरी कार्यालय रामेछापका प्रहरी प्रमुख नवराज ढुंगानाले बताए ।

घरभित्र सुतिरहेका बेला मध्य रातमा घरमा  लागेको आगोका कारण बृद्ध बुबा र आमाको मृत्यु भएको भएपनि मनोहर कार्की र उनकी श्रीमती कल्पना कार्की तथा ३ बर्षकी छोरी स्मारीकाको भने झ्यालबाट हाम फालेर ज्यान बचाउन सफल भएको प्रहरीले जानकारी दिएको छ ।

घट्नाको जानकारी पाए लगत्तै राति नै बाम्ती प्रहरी चौकिबाट प्रहरी टोली गएको भएपनि प्रहरी घट्ना स्थलमा पुग्नु अगाडि नै  बृद्ध दम्पत्तिको मृत्यु भइसकेको प्रहरीले जनाएको छ ।

मृतकहरुको सव जलेको घरबाट खनेर निकालिएको थियो । आगलागि नियन्त्रणका लागि स्थानीय र प्रहरीले प्रयास गरेको भएपनि संभव भएको थिएन ।

घट्नाको सूचना पाए लगत्तै जिल्ला प्रहरी कार्यालय रामेछापबाट थप प्रहरी पठाइएको रामेछापका प्रहरी प्रमुख नवराज ढुंगानाले जानकारी दिए ।

आगलागीको कारण र क्षतिको पूर्ण विवरण आउँन बाँकि रहेको प्रहरीले जनाएको छ ।

मुलुकभरका ४२ जिल्लामा निषेधाज्ञा जारी