अखबार नेपाल ट्रेन्डिङ

रामेछापः मन्थली नगरपालिकाका प्रमुख रमेश कुमार बस्नेतले नगरसभामा बोलेको विषयलाई लिएर नेपाल पत्रकार महासंघ लगायतका विभिन्न पेशागत संघ संगठनहरुले विरोध गरेका छन् ।

गत पुस २८ गते मंगलबार मन्थली नगरपालिकाको आठौं नगर सभामा नगर प्रमुख बस्नेतले आफ्ना धाराणा राख्ने क्रममा नगरसभामा पत्रकारहरुको अनुपस्थिति भएको विषयलाई लिएर व्यक्त अभिब्यक्ति अशान्दार्भिक, अनैतिक र अशोभनिय भएको भन्दै उनको सार्वजनिक भनाईप्रति उनीहरुले विरोध प्रकट गरेका हुन् ।

बिहीबार पत्रकारसँग सम्बन्धित विभिन्न संघ संस्थाहरुले जारी गरेको विज्ञप्तिमा पुस २८ गते नगर प्रमुखले नगरसभाको कार्यक्रममा बोल्दै पत्रकारहरुलाई खान र लिन पाउने भए लाईन लागेर आउथे, अन्यथा कार्यक्रममा किन आउथे ? भन्दै तल्लो स्तरको उपमा दिएको कुराले समग्र पत्रकार र पत्रकारीता पेशाप्रति अपमान गरेको उल्लेख गरिएको छ ।

विहीबार नेपाल पत्रकार महासंघ र नेपाल प्रेस युनियनले छुट छुट्टै तथा नेपाल आदिवासी जनजाति पत्रकार महासंघ (फोनिज), नेपाल फोटो पत्रकार महासंघ, राष्ट्रिय दलित पत्रकारसंघ नेपाल, क्रियाशिल पत्रकार महिला (डब्लुडब्लुजे),सञ्चारिका समुह रामेछाप र रिपोर्टस क्लब नेपालले संयुक्त रुपमा विज्ञप्ति निकालेर नगर प्रमुख बस्नेतलाई यस्तो चुनौती दिएका हुन् ।

विज्ञप्तिमा जिल्लामा पत्रकारिता गरिरहेका कुनैपनि व्यक्ति लाईन लागेर पैसा लिन या खान मन्थली नगरपालिकामा नगएको स्पष्ट पार्दै यदि कोहि पत्रकार खान र लिनका लागि नगरपालिकामा गएको भए तीनका नाम सार्वजनिक गर्न चुनौति दिन चाहन्छौं भनिएको छ ।

नगर सभामा पत्रकारहरुलाई नबोलाउने तर लाजै नमानी आएनन् भनेर आफ्नो हैसियत र सार्वजनिक पदको गरिमालाई समेत बिर्सेर पत्रकार र पत्रकारिता पेशाप्रति अपमान गर्ने नगर प्रमुखको उक्त भनाई प्रति घोर भत्र्सना गर्दछौं विज्ञप्ति मार्फत भनेका छन् ।

पत्रकारहरु पेशागत मर्यादा र तोकिएको आचारसंहिता बमोजिम आफ्नो धर्म निर्वाह गर्ने कुरामा सदैब सचेत र सतर्क छन्, कुनैपनि राजनीतिक दल या जनप्रतिनिधिलाई आँच पुग्ने गरी यस अघि कुनै कार्य नगरेको हाम्रो दावी छ, पेशागत मर्यादामा रही कलम चलाउने पत्रकारहरुलाई जे मनमा लाग्छ त्यहि बोल्ने र तल्लो स्तरमा झरेर गालीगलौज गर्ने अधिकार जनप्रतिनिधी लगायत कोहि कसैलाई नभएको कुरा समेत स्मरण गराउन चाहन्छौं जारी विज्ञप्तिमा भनिएको छ ।