अखबार नेपाल ट्रेन्डिङ

काठमाडौं: नेपाल कम्युनिष्ट पार्टी (नेकपा)का अध्यक्ष केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेसँगै प्रमुख प्रतिपक्षी दल नेपाली कांग्रेसले चर्को बिरोध जनायो ।

प्रतिनिधिसभा विघटनलाई संविधान भत्काउने र मुलुकलाई अस्थिरता, अनिश्चितता, अराजकता र असफलतातर्फ लैजाने गम्भीर षडयन्त्र भएको बताउँदै यसको विषयमा थप निर्णय लिने भन्दै केन्द्रीय कार्यसमितिको आकस्मिक बैठक बोलाएको थियो ।

बैठक पुस ७, ८, ९ र १० गते गरी चार दिनसम्म चल्यो । बैठक संसद विघटनको विरोधमा १३ पुसमा १६५ वटै निर्वाचन क्षेत्रमा हुने प्रदर्शन र मेलमिलाप दिवसका कार्यक्रमहरु रहेको भन्दै १९ पुससम्मका लागि स्थगित गरिएको छ ।

प्रधानमन्त्री ओलीको कदमलाई कांग्रेस सभापति शेर बहादुर देउवाले चर्को रुपमा बिरोध गर्न चाहेका छैनन् । उनको ईच्छा ताजा जनादेशमै जान चाहेका कारण ओलीको कदमलाई भित्री रुपमा समर्थन जनाएका छन् । उनले जनताको आँखामा विरोध गरेजस्तो गरेपनि भित्री रुपमा चुनावी कार्यक्रमलाई तिव्रता दिने तयारी गरेका छन् ।

विरोध कार्यक्रम भन्दै वडा तहसम्म जाँदा चुनावी रणनीतिलाई प्राथमिकता दिने देउवाको तयारी रहेको उनीनिकट नेताहरुले बताएका छन् । प्रमुख प्रतिपक्षी दलको नेताले यसरी मौन समर्थन गरेको देखेपछि प्रधानमन्त्री ओली झन हौसिएका छन् ।

पुष्पकमल दाहाल (प्रचण्ड) र माधबकुमार नेपाल पक्षले ओलीको यो कदमबिरुद्ध सडक संघर्ष गरिरहेको अवस्थामा देउवाले ओलीलाई भित्री रुपमा सहयोग गर्नुलाई निकै अर्थपूर्ण रुपमा हेरिन थालिएको छ । यसले प्रचण्ड नेपाल पक्षलाई तनाव पनि सिर्जना गरेको छ ।

सर्वोच्च अदालतले पनि प्रतिनिधिसभा विघटनको विषयमा सरकारका नाममा कारण देखाउ आदेश जारी गरेको छ । सर्वोच्चले यो अवस्थामा कस्तो आदेश दिने हो त्यो गर्भकै अवस्थामा रहेको छ । यसले पनि प्रचण्ड नेपाल पक्षले ठोस निर्णय लिन सकिरहेको छैन ।

यो समूहले प्रधानमन्त्री ओलीलाई जसरी पनि गलाउने पक्षमा देखिएको छ । तथापी कांग्रेस सभापति देउवाले धाप मारेपछि ओली टस न मसको अवस्थामा रहेका छन् । उनी झन हौसिएका छन् ।

उता कांग्रेसका वरिष्ठ नेता रामचन्द्र पौडेल, गगन थापा लगायतका नेताहरु संसद भंग गर्नु असंवैधानिक भन्ने निष्कर्षमा पार्टी पुगिसकेकाले सडक आन्दोलन चर्काउनुपर्छ भन्ने मत राखिराखेका छन् । तर सभापतिले मौनता साँध्दा उनीहरुको आवाज पनि दबिने खतरा बढिरहेको पार्टीभित्र हल्ला चल्ने गरेको छ ।