अखबार नेपाल ट्रेन्डिङ

रामेछापः रामेछापको उमाकुण्ड गाउँपालिकामा दुगड हाईड्रोपावर प्रा.लि.ले निर्माण गर्दै गरेको जलविद्युत आयोजनामा बर्दियाबाट आएका ४७ जना कामदारमा कोरोना भाइरस संक्रमण देखिएपछि गाउँपालिकाले जबरजस्ती फिर्ता पठाईएको भनि विभिन्न सञ्चारमाध्यमहरुमा समाचार प्रकाशन तथा प्रशारण भएकोप्रति गम्भीर ध्यानाकर्षण भएको सूचना जारी गरेको छ ।

जारी सूचनामा भनिएको छ- “जलविद्युत आयोजनाले संक्रमित व्यक्तिहरुलाई आईसोलेसनमा राखी उपचार गर्नुपर्नेमा गाउँपालिकालाई समेत कुनै जानकारी नदिई गैरकानुनी हिसावले संक्रमित कामदार फिर्ता गर्नु गम्भीर अमानवीय कार्य हो । यस किसिमको अमानवीय कार्यप्रति उमाकुण्ड गाउँपालिका खेद प्रकट गर्दछ ।”

आयोजनाको यस्तो गतिविधिले कोरोना संक्रमणको उच्च जोखिममा रहेको गाउँपालिकामा झन् जोखिम बढ्नसक्ने खतरा बढेको भन्दै संक्रमित व्यक्तिहरुको सम्पर्कमा गएका व्यक्तिहरुको पीसीआर परीक्षण गर्ने कामलाई तत्काल अगाडि बढाउन र कोरोना संक्रमणको जोखिम न्यूनिकरणको लागि कुनैपनि सुरक्षा मापदण्ड र सतर्कता आयोजनाको तर्फबाट नअपनाएकाले आवश्यक सुरक्षा सतर्कता र मापदण्ड पूरा गरेर मात्र आयोजनाको काम अगाडि बढाउन उमाकुण्ड गाउँपालिकाले सूचना जारी गरेको छ ।