अखबार नेपाल ट्रेन्डिङ

काठमाडौं: कोरोना भाइरस संक्रमित हुने नेपालीको संख्या ८० हजार नाघेको छ ।

नेपालसहित विभिन्न देशहरुमा ८० हजार २ सय १६ जनामा नेपालीमा कोरोनाको संक्रमण पुष्टि भएको गैरआवासीय नेपाली संघ (एनआरएनए)का स्वास्थ्य समिति संयोजक डा. संजीव सापकोटाले जानकारी दिएका छन् ।

हालसम्म नेपाल बाहेक विदेशमा मात्र ३४ हजार ९ सय ३९ जनामा कोरोना संक्रमण देखिएको छ । तीमध्ये ३२ हजार ९ सय ८९ जना कोरोना संक्रमणबाट मुक्त भएको समितिको तथ्यांकले देखाउँछ । यो नेपालबाहिर रहेका कुल संक्रमित संख्याको ९४ प्रतिशत हो ।

नेपालमा मात्रै ४५ हजार २ सय ७७ जना कोरोना भाइरसबाट संक्रमित भएको स्वास्थ्य तथा जनसंख्या मन्त्रालयले जनाएको छ । संक्रमितमध्ये २७ हजार १ सय २७ जना संक्रमणमुक्त भएका छन् । नेपालमा कोरोना मुक्त हुनेको संख्या औसतमा ६० प्रतिशत रहेको छ ।

हालसम्म कोरोनाको संक्रमणबाट ज्यान गुमाउने नेपालीको संख्या ४ सय ८० पुगेको एनआरएनए स्वास्थ्य समितिले जनाएको छ । नेपाल बाहिर विभिन्न १६ देशमा संक्रमणका कारण मृत्यु भएका नेपालीको संख्या २ सय पुगेको छ ।

कोरोनाको संक्रमणबाट बेलायत, अमेरिका, यूएई, साउदी अरब, बहराइन, कुवेत, कतार, आयरल्याण्ड, जापान, टर्की, नेदरल्याण्ड, स्वीडेन, भारत, दक्षिण अफ्रिकालगायत १६ देशमा नेपालीहरुको ज्यान गएको हो ।