अखबार नेपाल ट्रेन्डिङ

काठमाडौं: कोरोना महामारीका बेला अग्रपंक्तिमा खटिएका सुरक्षाकर्मीहरुको तलब रोकिएको छ ।

महामारी शुरु भएदेखि नै सुरक्षाकर्मीको भत्ता नआएको चार महिनापछि तलब पनि रोकिएको हो । सरकारकै प्राविधिक कमजोरीका कारण सुरक्षाकर्मीले तलब पाउन नसकेका हुन् ।

महालेखा नियन्त्रकको कार्यालयले विकास गरेको नयाँ सफ्टवेयरमा डाटा इन्ट्री हुन नसक्दा नेपाली सेना, नेपाल प्रहरी र सशस्त्र प्रहरीको तलब रोकिएको जनाइएको छ ।

भदौ महिना सकिन लाग्दा पनि सुरक्षाकर्मीले साउनकै तलब पाउन सकेका छैनन् । तीन संगठनका सुरक्षाकर्मीको तलब रोकिएपछि काम गर्न जाँगर मरेको उच्च अधिकारीहरुको भनाई छ ।

भत्ता दिने भनेको सरकारले तलब समेत नदिएपछि केही सुरक्षाकर्मी आक्रोशित बनेका छन् ।

महालेखामा नयाँ सफ्टवेरमा डाटा इन्ट्रि गर्न समय लाग्ने भएपछि तलब रोकिएको दाबी छ । भत्ता दिने भनेर सबैभन्दा बढी जोखिममा रहेका नेपाल प्रहरी काममा खटिएपनि भत्ता पाउन सकेका छैनन् । कतिपय सुरक्षाकर्मी आफैले आफ्नै पैसामा पीसीआर परीक्षण गर्नुपरेको छ ।

सरकारले चार महिनाअघि कोरोना भाइरसको महामारीमा खटिने सुरक्षाकर्मीलाई प्रोत्साहन भत्ता दिने निर्णय गरेको थियो ।

यस्तै संक्रमित, आइसोलेसनमा रहेका र आशंका गरिएका विरामीको सुरक्षार्थ खटिएका र पीपीई लगाउन नपर्नेका लागि ५० प्रतिशत भत्ता दिने भनिएको थियो । लकडाउन र सामाजिक दूरी कायम गर्न खटिने सुरक्षाकर्मीलाई दैनिक ३ सय रुपैयाँ प्रोत्साहन भत्ता पाउने भनिएको थियो ।

तर अहिले पनि भत्ता नदिएपछि सुरक्षाकर्मी निराश छन् । त्यसमाथि अहिले सयौ प्रहरी, केही नेपाली सेना र सशस्त्र प्रहरी नै संक्रमित हुँदा पनि सरकारबाट पाउनुपर्ने उचित सेवा, सुविधा र हौसला पाउन सकेका छैन ।