अखबार नेपाल ट्रेन्डिङ

बैतडी: नेपाल-भारत सीमानाका बैतडीको झुलाघाट आजदेखि तीन दिनका लागि बन्द हुने भएको छ । भारतको पिथौरागढमा अक्टोबर ५ तारेख (असोज १८ गते ) जिल्ला पञ्चायत तथा ग्राम पञ्चायत सदस्य निर्वाचन हुने भएकाले सीमा नाका बन्द हुन लागेको प्रमुख जिल्ला अधिकारीले जनाएको छ ।

निर्वाचन सुरक्षा संवेदनशिलता कारण सीमा नाका बन्द गर्ने बिषय दुवै देशक अधिकारीबीच छलफल भएको जनाइएको छ । आज साँझ सवा पाँच बजेदेखि असोज १८ गते साँझ सवा पाँच बजेसम्म तीन दिन अन्तर्राष्ट्रिय सिमा (पुल) बन्द हुने भएको छ । यस्तै अक्टोवर १६ तारेख (असोज २८ गते) दिन भारतको धार्चुलामा पनि पञ्चायत तथा ग्राम पञ्चायत सदस्य निर्वाचन हुने हुँदा निर्वाचनको बेला अवाञ्छित क्रियाकलाप नहोउन भनेर दार्चुलाको सीमानाका पनि बन्द हुने भएको हो । उक्त नाका असोज २७ गते साँझ सवा पाँच बजेदेखि असोज २९ गते साँझ सवा पाँच बजेसम्म बन्द हुने जनाईएको छ ।

दशैंका बेला सीमानाका बन्द भएपछि भारतबाट घर फर्किने नेपालीलाई समस्या हुने देखिएको छ । दशैंका लागि घर फर्कनेको सीमा नाकामा घुँइचो लागेको छ । बिरामी तथा अन्य आकस्मिक कामका लागि नाका खोल्नुपरेमा आपसी सहमति खोलिने जनाइएको छ ।