अखबार नेपाल ट्रेन्डिङ

काठमाडौं: नेपालको एक मात्र जनकपुर-जयनगर रेल सेवा विधिवत सञ्चालनकालागि नेपालको राष्ट्रिय झण्डा अंकित रंगमा तयार पारिएका दुवै रेल सेट जनकपुर आइपुगेका छन्।

रेल्वे विभाग नेपालले लामो समयको प्रतिक्षापछि बहुप्रतिक्षित कुर्था-जनकपुर-जयनगर रेल्वे सेवा सञ्चालनकालागि २ सेट रेलको बगी र ४ वटा इन्जिन भारतको मद्रासमा बनाएर हाजिपुर-जयनगर हुँदै जनकपुरधाम ल्याइएको जनाएको छ ।

भारतको जयनगरबाट जनकपुर हुँदै कुर्थासम्म ३४ किलोमिटरमा गत वर्षको मंसिर महिना पहिलो सातामै लिक परीक्षण भएको थियो । कुर्था-जनकपुरधाम-जयनगरसम्म रेल सञ्चालनका लागि १ अर्बको लागतमा भारतको मद्रासस्थित इन्टिग्रल कोक्स नामक कम्पनीसँग सम्झौता गरेको थियो।

एक पटकमा १३ सय यात्रु अटाउने क्षमता रहेको दुवै रेल सेट जनकपुर आइपुगेका छन्। रेल शनिवार भारतीय पक्षले नेपाललाई हस्तान्तरण गर्नेछ । रेल आएपछि जनकपुरमा स्थानीयले खुशीयाली मनाएका छन् ।