अखबार नेपाल ट्रेन्डिङ

काठमाडौं: नेपालमा आइतबार एकै दिन १ सय ६६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार योसँगै संक्रमितको संख्या १५ सय ६७ पुगेको हो ।

रौतहटमा २९ जना, सल्यानका २५ जना, धनुषाका २१ जना, कालिकोट र दैलेखका १८/१८, सप्तरी राजगढका १२ जना, सर्लाहीका १० जना, बाँकेका ८ जना, पर्सा र कपिलवस्तुका ५/५ जना, झापाका ४ जना, कैलाली र बाजुराका ३/३ जना, स्याङ्जाका २ जना, तनहुँ र मोरङका एक/एक जना तथा सुर्खेतकी चार महिने एक बालिकामा संक्रमण पुष्टि भएको मन्त्रालयका प्रवक्ता देवकोटाले जानकारी दिए ।

स्वास्थ्य तथा जनसंख्या मन्त्रालयका अनुसार प्रदेश १ मा १ सय ६५ जना, प्रदेश २ मा ६ सय २४ जना, बागमती प्रदेशमा ४५ जना, गण्डकी प्रदेशमा २३ जना, प्रदेश ५ मा ५ सय ६० जना, कर्णाली प्रदेशमा १ सय २३ जना र सुदूरपश्चिम प्रदेशमा २७ जनामा संक्रमण देखिएको मन्त्रालयका प्रवक्ता डा विकास देवकोटाले जानकारी दिए ।

मन्त्रालयका प्रवक्ता देवकोटाका अनुसार अहिलेसम्म पीसीआर विधिबाट ६७ हजार ५ सय ८२ र आरडीटी विधिबाट एक लाख ११ हजार १ सय ९ जनाको नमुना परीक्षण गरिएको छ । गत २४ घन्टामा पीसीआर विधिबाट २ हजार ८ सय ५३ र आरडीटी विधिबाट ४ हजार ५४ नमुना परीक्षण भएका छन् । यस्तै आइसोलेसनमा १ हजार ३ सय ४९ जना रहेका छन् भने क्वारेन्टाइन बस्नेको संख्या १ लाख १९ हजार १ सय ९२ पुगेको छ ।

आइतबार मकवानपुर हेटौंडाकी २५ वर्षीया महिलाको डिस्चार्जसँगै नेपालमा कोरोना निको हुनेको संख्या २ सय २० पुगेको छ ।