अखबार नेपाल ट्रेन्डिङ

हेटौंडा: नेपाली कांग्रेस बागमती प्रदेश सभापति चयनका लागि पुनः निर्वाचन हुने भएको छ ।

पहिलो चरणमा शनिबार भएको निर्वाचनमा सभापतिको उम्मेदवारहरु तीनै जनाको ५१ प्रतिशत नआएपछि आज पुनः निर्वाचन हुने भएको हो ।

शनिबार भएको निर्वाचनमा ईन्द्रबहादुर बानियाँले सबै भन्दा धेरै मत ल्याएका थिए ।

सभापतिमा पहिलो हुने बानियाँले ९ सय ९२ मत ल्याएका छन् भने दोस्रो हुने जगदिश्वर नरसिंह केसीले ८ सय ७२ मत ल्याएका छन् ।

तेस्रो हुने भीमसेनदास प्रधानले १ सय ९७ मत ल्याए । बढि मत ल्याउने बानियाँले ४८ प्रतिशत मत ल्याए ।

नेपाली कांग्रेसको विधान अनुसार कुल मतको बहुमत  अर्थात ५१ प्रतिशत मत पाए मात्रै सभापतिमा विजयी हुने छ ।

तर, बागमती प्रदेशको सभापति बन्ने दौडमा रहेको तीनै जनाले बहुमत पाउन नसकेपछि आईतबार पुनः निर्वाचन हुने जनाइएको छ ।

कुल २ हजार १ सय ५१ मतमध्ये २ हजार ८३ मत खसेको थियो ।

दोस्रो चरणको निवार्चनमा सभापतिको लागि बानियाँ र केसीबीच प्रतिष्पर्धा हुने भएको छ । पहिलो चरणमा सबैभन्दा कम मत ल्याएका प्रधान निर्वाचन प्रक्रियाबाट नै बाहिरिसकेका छन् ।

आईतबार बिहान ११:३० बजेबाट हुने दोस्रो चरणको  मतदानमा बानियाँ र केसीबीच प्रतिष्पर्धा हुने  भएको हो । बानियाँ संस्थापन पक्ष अर्थात् पार्टी सभापति देउवा  पक्षका  हुन् भने केसी इतर समुहका हुन् ।