माओवादी केन्द्रले ७५३ वटै स्थानीय तहको सम्मेलन गर्दै, अध्यक्ष प्रचण्डले सबै स्थानीय तह सम्मेलनलाई भर्चुअलबाट सम्बोधन गर्ने
वि.सं.२०७८ मंसिर ११ शनिवार १३:०९
काठमाडौं: नेकपा (माओवादी केन्द्र)ले आज ७५३ वटा स्थानीय तहको अधिवेशन गर्दैछ ।
माओवादी केन्द्रले सम्पर्क समन्वय समिति र विशेष समिति समेत गरी कूल ७७६ वटा स्थानीय तह स्तरीय सम्मेलन आयोजना गरेको हो ।
स्थानीय तह सम्मेलनलाई आज अध्यक्ष पुष्पकमल दाहाल ‘प्रचण्ड’ले ‘भर्चुअल’ सम्बोधन गर्ने कार्यक्रम तय भएको छ ।
अध्यक्ष प्रचण्डले सबै स्थानीय तह सम्मेलनलाई एकैपटक सम्बोधन गर्न लागेका हुन् ।
माओवादीको सम्मेलनले प्रदेश सम्मेलनका लागि प्रतिनिधि समेत चयन गर्नेछ । मंसिर २५ गतेका लागि प्रदेश सम्मेलनको आयोजना गरिएको छ ।
आगामी पुस ११ देखि १३ गतेसम्म राष्ट्रिय सम्मेलन तय गरिएको छ ।
माओवादीले सबै स्थानीय तहको सम्मेलनको आवश्यक तयारी भइसकेको जनाएको छ । पार्टी संगठनलाई एउटा निश्चित विधि र पद्धति अनुसार अगाडि बढाउने उद्देश्यले पार्टी संरचनाभित्रै आन्तरिक निर्वाचनलाई पनि स्वीकार गरिएको छ ।
सोही अनुसार यही मंसिर ४ गते सबै वडाको सम्मेलन गरी नयाँ नेतृत्वसमेत चयन भइसकेको छ ।
माओवादीले पार्टी विधानको ब्यवस्था अनुसार, निर्वाचन आयोग गठन गरिसकेपछि निर्वाचन निर्देशिका, आचारसंहिता समेत तय गरेको छ ।
प्रदेशस्तरका सबै निर्वाचन समिति एक महिना अगाडि नै गठन भएका थिए ।
वडा सम्मेलनमा निर्वाचित भएका प्रतिनिधिले विधानमा भएको व्यवस्था अनुसार ३५ प्रतिशत महिला, २० प्रतिशत युवा, १५ प्रतिशत दलित र पाँच प्रतिशत मुश्लिमको प्रतिनिधित्व सुनिश्चित हुनेगरी नेतृत्व चयन गर्दछ ।
वडाबाट निर्वाचित भएका प्रतिनिधिका आधारमा गाउँस्थानीय तहमा १५० जनाका दरले सहभागी हुने छन् । यस्तै‚ नगरमा २००, उपमहानगरमा ३०० र महानगरमा ४०० प्रतिनिधिको उपस्थितिमा अधिवेशन हुने छ । सबै स्थानीय तह अधिवेशनलाई व्यवस्थित तरिकाले सम्पन्न गर्न माओवादी केन्द्रले विशेष परिपत्र गरिएको जनाएको छ ।
वि.सं.२०७८ मंसिर ११ शनिवार १३:०९