अखबार नेपाल ट्रेन्डिङ

काठमाडौं: कोरोना भाइरसको संक्रमण बढेपछि ६२ जिल्लामा निषेधाज्ञा जारी भएको छ ।

कोरोना न्यूनिकरणका लागि वैशाख ७ देखि जारी हुन थालेको निषेधाज्ञा ६२ जिल्लामा पुगेको छ । त्यसमध्ये ५० जिल्लामा पूर्ण र १२ जिल्लामा आंशिक आदेश जारी भएको छ ।

शनिबार साँझसम्म ६२ जिल्लामा निषेधको आदेश जारी भएको गृह मन्त्रालयले जनाएको छ ।

पछिल्लो पटक निषेधाज्ञा गरिएको जिल्लामा  रौतहट र संखुवासभा थपिएका छन् ।

स्वास्थ्य तथा जनसंख्या मन्त्रालयको तथ्यांक अनुसार ४३ वटा जिल्ला बढी जोखिममा देखिएका छन् ।

२२ जिल्लामा ५०० जनाभन्दा बढीमा संक्रमण पुष्टि भइसकेको छ ।

निषेधाज्ञाभर अत्यावश्यक बाहकेका सेवा र सवारीसाधन सञ्चालनमा रोक लगाइएको छ ।

कोरोना भाइरसको सङक्रमण देशभर नै बढिरहेकोले निषेधाज्ञा अझै बढ्न सक्ने मन्त्रालयले जनाएको छ ।

गृह मन्त्रालयले काम नपरी बाहिर ननिस्कन आग्रह गरेको छ ।

अनावश्यक बाहिर निस्कने र निषेधाज्ञा उल्लंघन गर्नेलाई सङ्क्रामक रोग ऐन २०२० अनुसार कारबाही गरिने मन्त्रालयले चेतावनी दिएको छ ।

दोस्रो चरणको कोरोना संक्रमण नेपालमा दिनदिनै बढ्दै गएको छ ।

पछिल्लो २४ घण्टामा नेपालमा ९ हजार १ सय १६ जना संक्रमित थपिएका छन् ।

५० जनाको मृत्यु भएको छ ।

काठमाडौंमा ३ हजार ८९, ललितपुरमा ६ सय ४३ र भक्तपुरमा ३ सय ७४ जना संक्रमित थपिएका छन् ।

संक्रमितमध्ये ७२ हजार ७ सय ६९ जना होम आइसोलेसनमै छन् ।

५ हजार ८ सय ६० जना उपत्यका बाहिरका संस्थागत आइसोलेसनमा रहेको स्वास्थ्य मन्त्रालयले जनाएको छ ।

अहिले अस्पतालका आईसीयूमा ७ सय २८ जना र भेन्टिलेटरमा २ सय ३१ जना छन् ।

उपत्यकाका अस्पतालमा १५ सय १९ जना आइसोलेसनमा, १ सय ९४ जना आईसीयूमा र भेन्टिलेटरमा ८८ जना रहेको स्वास्थ्य मन्त्रालयले जनाएको छ ।

हेर्नुहोस् तपाईको आज २०७७ बैशाख २५ गते शनिबारको तपाईको राशिफल