अखबार नेपाल ट्रेन्डिङ

काठमाडौं: जल तथा मौसम पूर्वानुमान महाशाखाले नेपालको पश्चिमी उच्च पहाडी र हिमाली भू-भागमा भारी हिमपात हुने सम्भावना रहेको जनाइएको छ । देशका मध्य र पूर्वका उच्च पहाडी र हिमाली भू-भागमा समेत हल्कादेखि मध्यम हिमपातको सम्भावना रहेको महाशाखाले जनाएको छ ।

देशैभरी बदली भई अधिकतम र न्युनतम तापक्रममा गिरावट आई देशैभरी चिसो बढ्ने र यस प्रणालीका कारण देशका पश्चिमी भू-भागका धेरै स्थानमा र मध्य र पूर्वी भू-भागका केही स्थानमा हल्का वर्षाको सम्भावना समेत रहेको महाशाखाले आज बिहान जारी गरेको विशेष बुलेटिनमा उल्लेख छ ।

बुधबारबाट शुरू भएको यो मौसमी प्रणाली शनिबारसम्ममा अन्त्य हुने जनाइएको छ । उच्च पहाडी र हिमाली भू-भागमा भारी हिमपात हुन सक्ने र पहाडी भेगमा वर्षा हुने तथा तापक्रममा पनि गिरावट हुने सम्भावना रहेको हुनाले सतर्कता अपनाउन सबैमा महाशाखाले अनुरोध गरेको छ । हाल देशको पश्चिमी भू-भागमा सामान्यदेखि पूर्ण बदली साथै मध्य तथा पूर्वी भूभागमा सामान्य बदली रहेको महाशाखाको भनाई छ । आगामी शनिबारसम्म नै चिसो र हल्का वर्षा तथा भारी हिमपातको सम्भावना रहेको जनाइएको छ ।