अखबार नेपाल ट्रेन्डिङ

काठमाडौं: राष्ट्रिय फोटो पत्रकार समूह, नेपाल (एनएफपिजे) का १४ सदस्यीय फोटो पत्रकारको टोली चीन भ्रममा निस्किएको छ । पिन्चाओ फोटोग्राफर एसोशियसनको निमन्त्रणामा एनएफपिजे नेपालका केन्द्रीय अध्यक्ष प्रदीपराज वन्तको नेतृत्वमा १४ सदस्यीय केन्द्रीय टोली फोटो प्रर्दशनीको लागि चीनको सान्तोङ प्रान्त प्रस्थान गरेको हो ।

चीनका चर्चित फोटोग्राफर सु छुई तथा नेपाल चीन मैत्री संघको सहकार्यमा हुन लागेको हिमशृंखलामाथिको उडानले भरिएको नेपाल (सान्तोङ सांस्कृतिक सप्ताह र मनमोहक नेपाल) फोटो प्रदर्शनीमा नेपालका पर्यटनक्षेत्र, कला संस्कृति, जीवनशैली तथा विविधता झल्काउने करिव एक सय मनमोहक तस्वीरहरु सान्तोङ प्रान्तका विभिन्न शहरहरूमा एक महिनासम्म प्रर्दशनी गरिने भ्रमण टोलीका संयोजक सुनिल शर्माले जानकारी दिएका छन् ।

भ्रमणले दुई देशबीचका फोटोग्राफर र फोटो पत्रकारबीच मित्रता स्थापना हुनका साथै एक अर्काको देशको सांस्कृतिक तथा पर्यटन प्रर्वद्धनमा सहयोग पुर्याउने हेतुले कार्यक्रम आयोजना गर्न लागिएकोले उक्त अवसरमा चीनका विभिन्न पर्यटकीय साथै शैक्षिक क्षेत्रको पनि अवलोकन गरिने एनएफपीजेका कोषाध्यक्ष तथा भ्रमण टोलीका सदस्य प्रदीप कुमार श्रेष्ठले जानकारी दिए ।