अखबार नेपाल ट्रेन्डिङ

काठमाडौं: काठमाडौंका तीन स्थानमा विभिन्न समूहले प्रदर्शन गर्दै छन् । माइतीघरमा केही दिनदेखि सहकारी पीडितहरूले प्रदर्शन गरिरहेका छन् भने आज सत्ताधारी नेकपा एमाले र मेडिकल व्यवसायी दुर्गा प्रसाईँ समूहले पनि काठमाडौंका विभिन्न स्थानमा प्रदर्शन गर्ने भएका हुन् ।

एमालेले दरबारमार्गमा जागरणसभा गर्दैछ । एमालेले भद्रकालीबाट र्‍याली निकालेर सुन्धारा, वीर अस्पताल, रत्नपार्क घन्टाघर हुँदै दरबारमार्गमा सभा गर्नेछ । यस्तै हाल हिरासतमा रहेका मेडिकल व्यवसायी दुर्गा प्रसाईँको समूहले पनि कोटेश्वरमा प्रदर्शन गर्दैछ । यसरी आज एकैदिन तीन ठाउँमा प्रदर्शन हुने भएपछि जिल्ला प्रशासन कार्यालयले काठमाडौंको सुरक्षा व्यवस्था कडा पारेको जनाएको छ ।

काठमाडौंका प्रमुख जिल्ला अधिकारी जयनारायण आचार्यले तीन ठाउँमा प्रदर्शन हुने भएकाले आम नागरिकको जनजीवन सहज र सुरक्षित बनाउन आज पाँच हजारभन्दा बढी प्रहरी खटाइएको जानकारी गराएका छन् । त्यस्तै ट्राफिक व्यवस्थापन अस्तव्यस्त नहोस् भन्नाका लागि पाँच सयभन्दा बढी ट्राफिक प्रहरी परिचालन गरिएको जानकारी पनि उनले जानकारी दिएका छन् । सुरक्षामा नेपाल प्रहरी र सशस्त्र प्रहरी बल खटिने उनले बताए ।