अखबार नेपाल ट्रेन्डिङ

रामेछाप: रामेछापको उमाकुण्ड गाउँपालिकाले बर्खे बिदाको समयलाई सदुपयोग गर्दै माध्यमिक विद्यालयका विद्यार्थीहरुलाई कम्प्युटर शिक्षाको तालिम प्रदान गरेर सदुपयोग गरेको छ ।

अहिले बर्खे बिदाको सदुपयोग गर्दै गाउँपालिकाले सबै माध्यमिक विद्यालयमा बर्खे बिदाको समयमा कम्प्युटर कक्षा सञ्चालन गरिरहेको छ । गाउँपालिकामा रहेका ७ वटै माध्यमिक विद्यालयमा गत असार ३० गतेदेखि दैनिक कम्प्युटर कक्षा सञ्चालन गरिरहेको गाउँपालिकाको शिक्षा शाखाका अधिकृत ङावा शेर्पाले जानकारी दिए  ।

हरेक विद्यालयमा दैनिक ३/३ वटा कम्प्युटर कक्षा सञ्चालन भइरहेका शेर्पाले बताए । ७ वटा माध्यमिक विद्यालयमा अध्ययनरत कक्षा ८ देखि कक्षा १२ सम्मका विद्यार्थीहरूलाई बर्खे बिदाको समयलाई लक्षित गरी दैनिक दुई घण्टा १५ दिने कम्प्युटर (अफिस प्याकेज) कक्षा सञ्चालन भइरहेको गरिएको शेर्पाले जानकारी गराए ।

असार ३० गतेबाट सुरु भएको कम्प्युटर कक्षा साउन १२ गतेसम्म सञ्चालन हुनेछ । एउटा माविमा २० वटा कम्प्युटर भएकाले २० जना विद्यार्थीको एउटा समूह बनाएर कक्षा सञ्चालन गरिएको छ भने हरेक विद्यालयमा दुई घण्टाका दरले दैनिक तीनवटा कक्षा सञ्चालन भईरहेको छ ।