अखबार नेपाल ट्रेन्डिङ

रामेछाप: उमाकुण्ड गाउँपालिकाको वडास्तरीय अनिवार्य तथा नि:शुल्क शिक्षा घोषणा कार्यक्रम अन्तर्गत वडा नम्बर-१ को गुम्देलमा सम्पन्न भएको छ । उमाकुण्ड वडा नम्बर १ द्वारा आयोजित वडा अध्यक्ष ङावा टेण्डु शेर्पाको अध्यक्षतामा कार्यक्रम सम्पन्न भएको हो ।

कार्यक्रमका प्रमुख अतिथि शेर बहादुर सुनुवारले विद्यार्थीको संख्या कम हुँदै गएकोले अबको दिनमा विद्यालयहरु मर्जर गरेर सञ्चालन गर्नुपर्ने बताए । आजभोलि गाउँघरमा विद्यार्थीहरुले अध्यन गर्न सहरतिर लाग्दै गर्दा विद्यालयहरु खाली हुदै गएकोमा चिन्ता व्यक्त गरे । विद्यालयका संरचनाहरु राम्रो हुँदै गयो तर विद्यालय खाली हुनु निराशाजनक भएकोले आगामी दिनमा माद्यामिक विद्यालयहरु पनि बन्द हुनसक्ने बताउदै अब विद्यालय मर्जर गर्नुपर्ने बताए ।

कार्यक्रमको विशिष्ट अतिथि पालिका उपाध्यक्ष सावित्री सुनुवारले कुनैपनि बालबालिका शिक्षाबाट बञ्चित नहुनुपर्नेमा जोड दिँदै शिक्षामा रामेछापको ८ स्थानीय तह मध्ये उमाकुण्डको शिक्षामा पहिलो भएको बताए । शिक्षक र अविभावक नङ र मासुको जस्तो सम्बन्ध रहेको बताउँदै सबै मिलेर बालबालिकालाई विद्यालयमा ल्याउनुपर्नेमा जोड दिए । यो कार्यक्रम प्रदेश सरकार मार्फत अहिले चलेको र अबको आर्थिक वर्षबाट स्थानीय सरकारले नै बजेट छुट्याएर कार्यक्रम गर्ने बताए ।

त्यस्तै वडा अध्यक्ष ङावा टेण्डु शेर्पाले बालबालिकालाई अभिभावकले मोबाइल चलाउन दिएको कारण उनीहरुको पढाईमा बाधा भएको कारण बालबालिकालाई मोबाइलबाट टाढा राख्नुपर्ने धारणा राखे । आगामी दिनमा शिक्षाको निम्ति वडाको लागि सधै अघि बढ्ने बताए । हालसम्म उमाकुण्ड १ मा कुनैपनि बालबालिकाले शिक्षाबाट बञ्चित नभएको बताए । त्यसैगरी पालिकाका शिक्षा शाखा प्रमुख ङावा शेर्पाले  कुनैपनि बालबालिका विद्यालय भन्दा बाहिर भए विद्यालयमा  ल्याउने बताए ।  बालबालिकाको सिकाइ सुधार भएमा मात्र उनीहरुको भविष्य उज्ज्वल हुने बताए । अभिभावकको साझेदारीमा हाल दिवा खाजा सञ्चालन भएको बताए । कार्यक्रममा उमाकुण्डका विभिन्न विद्यालयका प्रधानाध्यापक, विभिन्न राजनीति दलका प्रतिनिधि र अभिभावकहरुको उपस्थिति रहेको थियो ।