अखबार नेपाल ट्रेन्डिङ

नयाँ वर्ष २०८१ को पहिलो दिन बैशाख १ गते तपोवनमा ओशो महोत्सव भएको छ । ‘ओशो तपोवन जाऊँ, नयाँ वर्ष मनाऊँ’ भन्ने नाराका साथ महोत्सव सम्पन्न भएको छ । महोत्सवमा ओशो साहित्य प्रदर्शनीमा ओशोका पुस्तकहरू विशेष छुटमा उपलब्ध गराइएको थियो । त्यस्तै फुड फेस्टिवलको पनि आयोजना गरिएको थियो ।

प्रवेश नि:शुल्क रहेको उक्त महोत्सवमा वर्षको पहिलो दिन ध्यान गरेर बिताए बाँकीका दिनहरू ध्यानमय हुनेछन् भन्ने मान्यतालाई अङ्गीकार गर्दै ओशो तपोवनले वर्षको पहिलो दिन यस महोत्सवको आयोजना गर्ने गरेको हो । ओशोका ध्यान विधिहरू सरल हुने भएकाले पहिलोपटक ध्यानको स्वाद लिन चाहनेले पनि यस दिनलाई ध्यान सिक्ने अवसरको रूपमा लिन सकिन्छ ।

ओशो महोत्सव उद्घाटन उपराष्ट्रपति रामसहाय प्रसाद यादवले गरेका थिए । कार्यक्रममा उपप्रधान तथा परराष्ट्रमन्त्री नारायणकाजी श्रेष्ठ, पूर्व शिक्षामन्त्री गिरिराजमणि पोखरेल लगायत विशिष्ट व्यक्तिहरुको उपस्थिति रहेको थियो । कार्यक्रममा हास्य कलाकार मनोज गजुरेल, गायक सत्यराज र स्वरुपराज आचार्यको प्रस्तुति रहेको थियो ।