नेकपा एमाले रामेछाप-काठमाडौं सम्पर्क मञ्चको १२औं अधिवेशनको तयारी पूरा, ४३४ प्रतिनिधि चयन
वि.सं.२०८० फागुन २४ बिहीवार १७:४५
काठमाडौं: नेकपा एमाले रामेछाप-काठमाडौं सम्पर्क मञ्चको १२औं अधिवेशनको तयारी पूरा भएको छ । प्रेस चौतारी नेपाल, रामेछापले बुधबार शंखमुलस्थित ए वान क्याफेमा आयोजित पत्रकार सम्मेलनमा सम्पर्क मञ्चका अध्यक्ष राकेश श्रेष्ठले फागुन २६ गते शनिबार हुने १२ औं सम्मेलनको तयारी पूरा भएको जानकारी दिएका हुन् ।
अधिवेशनको उद्घाटन नेकपा एमाले अध्यक्ष तथा पूर्वप्रधानमन्त्री केपी शर्मा ओलीले गर्ने तयारी भएको अध्यक्ष श्रेष्ठले बताए । उनले भने, ‘अधिवेशनको उद्घाटन एमाले अध्यक्ष केपी शर्मा ओलीबाट नै गराउने तयारी गरिरहेका छौं ।’ उनका अनुसार पार्टी केन्द्रीय कार्यालय तुलसलाल स्मृति प्रतिष्ठान च्यालनमा हुने अधिवेशनको सबै तयारी पूरा भएको छ । उनले अधिवेशनको लागि ८ वटा पालिकाबाट सदस्य संख्याको आधारमा ३०४ जना प्रतिनिधि सहभागी हुने जानकारी दिए । उनले भने,‘अधिवेशनबाट नयाँ नेतृत्व समेत चयन हुनेछ । यस अगाडिका अधिवेशनमा पनि हामीले सर्वसम्मतरुपमा नेतृत चयन गरेका थियौं । सम्पर्क मञ्चमा कुनै विवाद नरहेकाले यो अधिवेशनमा पनि सर्वसम्मत नेतृत्व चयन हुने विश्वास छ ।’
सम्पर्क मञ्चमा ४ हजार १६५ जना सदस्य रहेका छन् । अधिवेशनमा सबैभन्दा धरै खाँडादेवी गाउँपालिकाबाट काठमाडौंमा बस्ने सदस्यमध्येबाट १११ जना प्रतिनिधि सहभागी हुने रामेछाप-काठमाडौं सम्पर्क मञ्चका सचिव रवीन्द्र भण्डारीले जानकारी दिए । उनका अनुसार मन्थली नगरपालिकाबाट ५१, लिखु तामाकोशी गाउँपालिकाबाट ४१, रामेछाप नगरपालिका २६, दोरम्बा शैलुङ गाउँपालिकाबाट २५, गोकुलगंगा गाउँपालिकाबाट १९, सुनापति गाउँपालिकाबाट १९ र सबैभन्दा कम उमाकुण्ड गाउँपालिकाबाट १२ जना सहभागी रहनेछन् ।
त्यसैगरी आयोजक कमिटीबाट ७९, सल्लाहकार ४५ र जनवर्गीय संगठन ६ जनासमेत गरेर जम्मा ४३४ प्रतिनिधिले अधिवेशनमा भाग लिने भण्डारीले जानकारी दिए ।
वि.सं.२०८० फागुन २४ बिहीवार १७:४५