अखबार नेपाल ट्रेन्डिङ

काठमाडौं: दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऊ महाअभियान’ले फागुन १ गते भृकुटीमण्डपमा आमसभा गर्ने भएको छ । गत पुस २१ गते नै जिल्ला प्रशासन कार्यालय काठमाडौँमा पत्र पठाएर टुँडिखेलमा कार्यक्रम गर्न दिन अनुरोध गरिए पनि त्यहाँ अनुमति नपाएपछि प्रसाईंले भृकुटीमण्डपमा सभा गर्ने भएका हुन् ।

सामाजिक सञ्जालमा प्रसाईंले लेखेका छन्, ‘पुस २१ गते नै प्रशासन कार्यालयमा पत्र पठाएर फागुन १ गतेको लागि आमसभा गर्न स्थान मागेकोमा हामीलाई टुँडिखेलमा कार्यक्रम गर्नुहोस् भनेर सीडीओले पटकपटक भनेकै हुन् । तर आज आएर टुँडिखेलमा हुन्न, तपाईंहरू भृकुटीमण्डपमा कार्यक्रम गर्नुहोस् भनिँदै छ । टुँडिखेलमा चिनियाँहरूलाई कार्यक्रम गर्न स्थान उपलब्ध गराएका छन् । चिनियाँले कार्यक्रम गर्न स्थान पाउँछन् तर हामी नेपालीले आफ्नै देशमा सभा गर्ने ठाउँसम्म पाउँदैनौँ । यो त अति भएन र ?’

उनले उक्त कार्यक्रमलाई ‘नागरिक  मुक्तिको अन्तिम भाग’ भनेका छन् । फागुन १ को कार्यक्रमलाई सभ्य र भव्य बनाउन विभिन्न उपसमिति गठन गरिएको प्रसाईंले बताएका छन् । यसअघि प्रसाईंको समूहले गत मंसिर ७ गते बल्खु चोकमा कार्यक्रम गरेको थियो ।