अखबार नेपाल ट्रेन्डिङ

भक्तपुर: मल्लकालीन नवदुर्गा गणको ‘ङालाकेगु’ जात्रा​ ​शुरु भएको छ । बुधबारदेखि भक्तपुर-९ सूर्यमढीमा शुरु भएको जात्रा प्रत्येक दिन नगरपालिका क्षेत्रका फरक-फरक २१ टोलमा प्रदर्शन हुने देवगणका सदस्य नारायणमान बनमालाकाले जानकारी दिए ।

तान्त्रिक एवं दैवी शक्ति दर्शाउन प्रदर्शन गरिने यो जात्रा भक्तपुरको दत्तात्रेय, क्वाठण्डौं, गछेँ, दछुटोल, नागपोखरी, इनाचो, गोल्मढी, याछेँ, टौमढी, तालाको, पोटरी स्क्वायर, नासमना, गहिटीँ, क्वाछे, टिबुक्छे, सुकुलढोका, दरबार स्क्वायर, खौमा र इताछेँलगायतका टोलमा प्रदर्शन गरिन्छ ।

नवदुर्गा नाचमा भैरव, महाकाली, बाराही, गणेश, बह्मयणी, कुमारी, महेश्वरी, भद्रकाली, इन्द्रायणी, दुम्भसिंह, महादेव, श्वेत भैरवका रुपमा देवगणले नाच्ने गर्छन्।परम्परागत वेशभूषामा बाजाको तालमा देवताका प्रतीकका रूपमा देवगणले नाङ्गो खुट्टाले नै नाच प्रदर्शन गर्ने गर्छन् ।

मल्लकालीन प्रख्यात नवर्दुगा नाचभक्तपुरका राजा भुवन मल्लले प्रचलनमा ल्याएको इतिहासविद् प्राडा पुरुषोत्तमलोचन श्रेष्ठले बताए । नेपाल संवत् ६३३ मा भक्तपुर राज्यमा अनिकाल परेकाले सहकाल ल्याउन तान्त्रिक विधिअनुसार दैवी शक्तिको आह्वानान गरी नवदुर्गा नाचको प्रचलन चलाएको उनको भनाइ छ । -रासस