अखबार नेपाल ट्रेन्डिङ

काठमाडौं: प्रमुख प्रतिपक्षी नेकपा एमालेले मुलुकमा देखिएको अराजक क्रियाकलापलाई गठबन्धन सरकारले नै बढावा दिइरहेको भन्दै आपत्ति जनाएको छ ।

बुधबार पार्टी कार्यालय च्यासलमा बसेको एमाले केन्द्रीय कमिटी बैठकले मुलुकको परितर्वनलाई चूनौती दिने र जातीय र धार्मिक सहिष्णुतामा खलल पार्ने जस्ता अराजक क्रियाकलापलाई नियन्त्रण गर्नुको साटो गठबन्धन सरकारले बढावा दिइरहेको भन्दै आपत्ति जनाएको हो ।

बैठकले लोकतान्त्रिक गणतन्त्रकाविरूद्ध भइरहेका अराजक क्रियाकलापहरूको निन्दा गर्दै लोकतान्त्रिक गणतन्त्रको रक्षाका लागि दृढ सङ्कल्प गरेको एमाले जनाएको छ । त्यस्तै बैठकले जाजरकोट केन्द्रबिन्दु भएर गएको भूकम्पपछि राहत वितरणलाई राजनीतिक प्रचारबाजी नाफाघाटाको सौदाबाजीको विषय बनाइएको भन्दै आपत्ति प्रकट गरेको छ ।

भूकम्पपिडित पीडितहरूको पुनर्स्थापनाका लागि ठोस कार्ययोजनासहित अविलम्ब काम थाल्न र अस्थायी आवास तथा न्यानो कपडा उपलब्ध गराएर भूकम्पपीडित नागरिकको जीवन रक्षा गर्न बैठकले सरकारसँग माग गरेको छ । त्यस्तै बैठकले मंसिर १४ देखि तीन हप्तासम्म चल्ने मध्यपहाडी लोकमार्ग केन्द्रित विशेष अभियानको सम्पूर्ण तालिकालाई पारित गरेको छ । अभियानको मंसिर १४ गते बैतडीको झुलाघाटमा पार्टी अध्यक्ष केपी ओलीले शुभारम्भ गर्ने र पाँचथरको चिवाभञ्ज्याङमा समापन हुने कार्ययोजना बैठकले पारित गरेको छ ।

एमालेले मध्यपहाडी लोकमार्ग अभियानअन्तर्गत दार्चुलाको झुलाघाटदेखि पाँचथरको चिवाभञ्ज्याङसम्म समृद्धिका लागि संकल्प यात्रा गर्न लागेको हो । त्यस्तै एमालेले युवा संघले बिहीबार गर्न लागेको कार्यक्रमलाई सभ्य ढंगले सम्पन्न गर्न निर्देशन दिएको छ ।