अखबार नेपाल ट्रेन्डिङ

काठमाडौं: आन्दोलनरत स्थानीय तहका कर्मचारीले बुधबार वृहत् प्रदर्शन गरेका छन् । दिउँसो १२ बजे माइतीघर मण्डलामा भेला भएर झरीमा र्‍यालीसहित नयाँबानेश्वर पुगेका थिए ।

प्रदर्शनका लागि विभिन्न जिल्लाबाट कर्मचारी काठमाडौं आएका छन् । बिहीबार पनि प्रदर्शन गर्ने र सरकारले माग सुनुवाइ नगरे शुक्रबारदेखि स्थानीय तहका काम ठप्प पार्ने चेतावनी कर्मचारीले दिएका छन् ।  उनीहरूले मंगलबार कार्यालयमै कालोपट्टी बाँधेर काम गरेका थिए ।

सरकारले ल्याउन लागेको संघीय निजामती विधेयकमा आफूहरूलाई नसमेटेको विरोधमा काठमाडौं केन्द्रित आन्दोलन थालेका हुन् । ऐनविहीन अवस्थामा रहेका स्थानीय तहका कर्मचारीको माग सम्बोधन हुने गरी एकीकृत संघीय निजामती ऐन ल्याउनुपर्ने उनीहरूको माग छ ।