बाढीपहिरो प्रभावित क्षेत्रको अवलोकन गर्न प्रधानमन्त्री सवार हेलिकोप्टर मौसमका कारण विराटनगरमा आकस्मिक अवतरण
वि.सं.२०८० असार ४ सोमवार १५:३८
काठमाडौं: बाढीपहिरो प्रभावित क्षेत्रको अवलोकन गर्न प्रधानमन्त्री पुष्पकमल दाहाल ‘प्रचण्ड’को टोली सवार नेपाली सेनाको हेलिकोप्टर विराटनगरमा आकस्मिक अवतरण गरेको छ ।
संखुवासभाको तुम्लिङटारबाट दिउँसो पाँचथरतर्फ उडेको हेलिकोप्टर प्रतिकूल मौसमका कारण विराटनगरमा आकस्मिक अवतरण गरेको हो । प्रधानमन्त्रीका प्रेस संयोजक सूर्य किरण शर्माले प्रतिकुल मौसमका कारण प्रधानमन्त्री सवार हेलिकोप्टर विराटनगरमा अवतरण गरेको जानकारी दिएका छन् ।
यसअघि प्रधानमन्त्री प्रचण्डसँगै उपप्रधानमन्त्री तथा गृहमन्त्री नारायणकाजी श्रेष्ठ, भौतिक पूर्वाधार तथा यातायातमन्त्री प्रकाश ज्वालालगायत बाढीपहिरो प्रभावित क्षेत्रको अवस्थाका बारेमा जानकारी लिन संखुवासभा पुगेका थिए । त्यहाँ प्रधानमन्त्री प्रचण्डले बाढीपहिरो प्रभावितको उद्धार, राहत र बेपत्ताहरूको खोजीमा कुनै कन्जुस्याइँ नगर्न जिल्लाका सरकारी संयन्त्रहरूलाई निर्देशन दिएका थिए ।
त्यसपछि प्रचण्डसहितको टोली पाँचथरका लागि उडेको थियो । शनिबार राती आएको अविरल वर्षाका कारण संखुवासभाको हेँवा खोलामा बाढीले बगाउँदा १ जनाको मृत्यु भएको छ भने हाइड्रोपावरमा काम गर्ने १७ जना मजदुर सम्पर्कविहीन भएका छन् । यस्तै पाँचथरमा पनि बाढी पहिरोबाट ठूलो धनजनको क्षति भएको छ ।
वि.सं.२०८० असार ४ सोमवार १५:३८