अझै ३ दिन देशभर मौसम बदली र वर्षाको सम्भावना
वि.सं.२०८० वैशाख १८ सोमवार ०८:१५
काठमाडौं: देशभर मौसम बदली र वर्षा अझै ३ दिन जारी रहने सम्भावना देखिएको मौसमविद्ले बताएका छन् । मौसम पूर्वानुमान महाशाखाले सामान्यतया ३ दिनसम्मको मौसम अनुमान गर्ने गर्छ ।
मौसमविद्का अनुसार अहिले पनि लुम्बिनी र कर्णालीका एक–दुई स्थानमा हल्का वर्षा भइरहेको छ । दिउँसो पनि देशैभरका केही स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ ।
आज काठमाडौँ उपत्यकामा पनि हल्कादेखि मध्यमसम्म वर्षाको सम्भावना रहेको महाशाखाले जनाएको छ । साथै अपराह्नतिर मधेश प्रदेशका एक दुई स्थानमा हावाहुरी आउन सम्भावना पनि रहेको महाशाखाले जनाएको छ ।
यस्तै आज राति पनि देशभर मौसम आंशिकदेखि सामान्य बदली (आकाशमा बादल) रहने छ । यस क्रममा सुदूरपश्चिम र लुम्बिनी प्रदेशका केही स्थान तथा बाँकी प्रदेशका थोरै स्थानमा मेघगर्जन चट्याङसहित हल्का वा क्षणिक वर्षाको सम्भावना छ ।
मौसम महाशाखाले आज बिहान ६ बजे आगामी २४ घण्टाका लागि चेतावनी तथा परामर्श पनि जारी गरेको छ । जसमा भनिएको छ– देशैभरका केही स्थानमा मेघगर्जन/चट्याङसहित हल्का देखि मध्यम वर्षाको सम्भावना रहेको र सडक तथा हवाई यातायात, कृषि, पर्यटन, खेलकुद लगायतका क्षेत्रहरू प्रभावित हुन सक्ने देखिएकोले त्यसबाट हुन सक्ने क्षति/जोखिमबाट बच्न आवश्यक सतर्कता अपनाउन हुन अनुरोध छ ।
वि.सं.२०८० वैशाख १८ सोमवार ०८:१५