अखबार नेपाल ट्रेन्डिङ

काठमाडौं: काठमाडौं महानगरपालिकाका मेयर बालेन्द्र शाहले सामाजिक सञ्जालमार्फत् आफूलाई राजीनामा दिन लगाउन खोजिएको बताएका छन् ।

उनले फेसबुकमा लेखेका छन्, ‘मेयर पोजिसनबाट मलाई आज राजीनामा दिन लगाउन खोजिँदैछ । यो देश कहिले पनि बन्दैन ।’

तर कसले किन राजीनामा दिन बाध्य पारेको हो त्यसबारे बालेनले केही खुलाएका छैनन् । उनका समर्थकहरूले भने कमेन्टमा निर्वाचित मेयर पद कसैले खोस्न नमिल्ने भन्दै आफ्नो काममा अगाडि बढ्न सुझाव दिएका छन् । समर्थकहरूले कसैले राजीनामा माग्दैमा राजीनामा नगर्न पनि सुझाएका छन् ।

भारी मतले विजयी भएका बालेन त्यसयता काठमाडौंमा आक्रामक काम गर्दै आएका छन् । उनले नक्साविपरित निर्माण भएका टहरा भत्काउनुका साथै पार्किङ क्षेत्र पनि व्यवस्थित गरेका छन् । त्यस्तै थापाथलीको सुकुम्बासी बस्ती हटाउन पनि उनी निरन्तर पहल गरिरहेका छन् ।

उनले सरकारका सम्बन्धित निकायमा पनि यसबारे पहल गरेका छन् । यी काम गर्दैगर्दा उनीमाथि आलोचना गर्नेहरूको पनि कमी छैन । गरिब मजदुरहरूलाई उठिबास लगाउन खोजेको र पुरानो संरचनाहरू भत्काउन खोजेको भन्दै उनीमाथि एकथरीले आलोचना गर्दै आएका छन् ।