अखबार नेपाल ट्रेन्डिङ

काठमाडौंः गुठी संस्थान र पशुपति क्षेत्र विकास कोषले महाशिवरात्रीमा पशुपतिनाथको दर्शन गर्न आएका साधुसन्तलाई दक्षिणासहित बिदाइ गरेको छ ।

साधुसन्त नेपाल प्रवेश गरेदेखि नै खाने बस्ने र धुनीको व्यवस्था संस्थान र कोषले गरेको थियो । कोषले साधुसन्तहरुको वर्गीकरण गर्दै त्यहि अनुसारको खर्चको व्यवस्था गर्दै आएको छ ।

साधुसन्त बिदाइकै लागि गुठी संस्थानले छुट्याएको बजेटमा आधा रकम थप गर्दै कोषले साधुसन्तको बिदाई गरेको पशुपति क्षेत्र विकास कोषले जानकारी दिएको छ ।

महाशिवरात्रीमा पशुपतिनाथमा दर्शनका लागि आएका साधुसन्तलाई पशुपति राममन्दिर, मृगस्थलीको गोरखनाथ मन्दिर उमाकुण्डलगायतका स्थानमा राखी खाने, बस्ने एवम् धुनीका लागि काठको व्यवस्था गरिएको थियो । महाशिवरात्रीका लागि विभिन्न स्थानबाट आएका साधुसन्तलाई फागुन कृष्ण औंशीका दिन दक्षिणासहित बिदाइ गर्ने परम्परा छ ।