अखबार नेपाल ट्रेन्डिङ

वीरगन्ज: एक भारतीय नागरिकलाई हतियार देखाएर अपहरण गरी लुटपाट गर्ने ८ गिरोहलाई प्रहरीले नियन्त्रणमा लिएको छ ।

भारत बिहारका विशाल कुमार पटेवालाई वीरगन्ज महानगरपालिका-६ रेल्वेरोडबाट अपहरण गरी लुटपाट गर्ने ८ जना पक्राउ परेका हुन् । लुटेराको समूहले पटेवालाई माघ २६ गते अपहरण गरी लुटपाट गरेका थिए ।

पक्राउ पर्नेमा वीरगन्ज महानगरपालिका वडा नम्बर २ छपकैयाका सद्धाम अन्सारी, वडा नम्बर ११ श्रीपुरका सन्तोष लामा, मोजालिम मियाँ र रोशन थापा, वडा नम्बर २४ रामगढवाका विजय महतो, बाराको परवानीपुर गाउँपालिका वडा नम्बर ३ का नबाब हुसेन, कलैया उपमहानगरपालिका वडा नम्बर २३ का मुकेश पटेल र भारत बिहारको मोतिहारीका इमाम अन्सारी रहेको पर्सा प्रहरीले जनाएको छ ।

बाराको प्रसौनी गाँउपालिका वडा नम्बर १ घर भएका नातामा मामा पर्ने सुभाष साहलाई गत बिहीबार सापटी दिन भनी ६ लाख ५० हजार रुपैया लिएर पुगेका पटवा अपहरणमा परेका थिए ।

पक्राउ परेकाहरु यसअघि उक्त गिरोह भारतका विभिन्न आपराधिक घटनामा पनि संलग्न रहेको अनुसन्धानको क्रममा खुलेको प्रहरीले बताएको छ । पक्राउ परेकाहरुको साथबाट अपहरणमा प्रयोग गरेको १ थान पेस्तोल, ५ राउण्ड गोली, ४ लाख ९५ हजार नगद, ना १९ प २८०८, ना ६२ प १०० र बिआर १ सिआर २४२५ नम्बरको गरी ३ वटा मोटरसाइकल पनि बरामद गरिएको प्रहरीले जनाएको छ ।

पक्राउ परेका आठै जनाविरुद्ध अपहरण तथा शरीर बन्धक, डाँका, हतियार तथा खरखजाना एवं संगठित अपराध सम्बन्धी कसूरमा आवश्यक अनुसन्धान भइरहेको छ ।