अखबार नेपाल ट्रेन्डिङ

काठमाडौं: बागमती प्रदेशको उपसभामुखका लागि आज दिउँसो ३ बजे बागमती प्रदेशसभाको सचिवालयमा निर्वाचन हुने भएको छ ।

उपसभामुखको लागि २९ गते भएको मनोनयन दर्तामा तीन जनाले उम्मेदवारी दर्ता गराएका छन् । सत्ता गठबन्धन तर्फबाट एमालेकी अप्सरा चापागाईं, कांग्रेसकी सुना परियार र नेपाल मजदुर किसान पार्टीकी रिता काफ्लेले उपसभामुखमा उम्मेदवारी दर्ता गराएका हुन् ।

एमालेको चापागाईंलाई कुमारी मोक्तान प्रस्तावक तथा आशा लामाको समर्थकमा उम्मेदवारी दर्ता भएको हो । यस्तै नेमकिपाको काफ्लेलाई सृजना सायजु प्रस्तावक तथा सुरेन्द्रराज गोसाइँको समर्थकमा उम्मेदवारी दर्ता गरेकी छिन् ।

कांग्रेसकी परियारलाई प्रस्तावक उत्तम जोशी र याङ्किला शेर्पाको समर्थन रहेको छ । सरकारले आज शोकबिदा दिएको भएपनि प्रदेश सभाको पूर्वधिारित बैठक तथा उपसभामुखको निर्वाचन निर्धारित समयमै सञ्चालन हुने भएको छ ।

११० सदस्य रहेको बागमती प्रदेश सभामा एमालेको २७, कांग्रेसको ३७, माओवादीको २१, राप्रपाको १३, नेमकिपाको ३, एकीकृत समाजवादीको ७ र हाम्रो नेपाली पार्टीको २ सिट छ ।