अखबार नेपाल ट्रेन्डिङ

काठमाडौं: प्रधानमन्त्री निवास बालुवाटारमा बिहान साढे ९ बजेका लागि सत्तारूढ पाँच दलीय गठबन्धनको बैठक बस्ने भएको छ ।

सरकारले बिहीबार मात्रै आगामी ४ मंसिरका लागि प्रदेश र प्रतिनिधिसभा निर्वाचन एकै चरणमा गर्ने निर्णय गरेको छ ।

निर्वाचनको मिति घोषणा भएपछि पहिलोपटक सत्ता गठबन्धनका नेताहरु बसेर छलफल गर्न लागिएको हो ।

यसअघि बसेको गठबन्धनको बैठकले प्रतिनिधिसभा र प्रदेशसभा क्षेत्रको बाँडफाँटबारे समिति बनाएर अघि बढ्ने सहमति गरेको थियो ।

प्रतिनिधि सभाका १६५ र प्रदेश सभाको ३३० क्षेत्रको बाँडफाँटबारे आजको बैठकमा छलफल हुने बुझिएको छ ।

यसअघि स्थानीय तहको निर्वाचनको लागि पनि कांग्रेसका वरिष्ठ नेता रामचन्द्र पौडेलको नेतृत्वमा उच्चस्तरीय राजनीतिक संयन्त्र बनाइएको थियो ।

त्यो संयन्त्रले स्थानीय तहको तालमेल मोडालिटी बनाएको थियो ।