अखबार नेपाल ट्रेन्डिङ

रामेछापः आगामी आर्थिक वर्ष २०७९/८० को लागि मन्थली नगरपालिकाले १ अर्ब भन्दा बढीको बजेट ल्याउने तयारी गरेको छ ।

त्यसैगरी रामेछाप नगरपालिकाले आगामी आर्थिक वर्ष २०७९/८० को लागि करिब ४६ करोड बराबरको बजेट ल्याउने तयारी गरेको छ ।

यही १० गतेभित्र नीति तथा कार्यक्रम नगरसभामा प्रस्तुत गर्नुपर्ने प्रावधान रहेकाले नगरपालिकाले नौ वटै वडाको विकासको लागि प्राथमिकता निर्धारण गरेर बजेट विनियोजन गर्ने काम अघि बढाएको हो ।

मन्थली नगरपालिकाका नगरप्रमुख लव श्रेष्ठले १ अर्ब भन्दा बढीको बजेट ल्याउने तयारी गरिएको बताए । उनले नगरवासीले प्रत्यक्ष रुपमा महशुस गर्ने कार्यक्रमलाई प्राथमिकतामा राखेर नीति कार्यक्रम र बजेट ल्याउने बताए ।

त्यसैगरी रामेछाप नगरपालिकाका नगरप्रमुख लवश्री न्यौपानले आगामी आर्थिक बर्षको लागि करिब ४६ करोड बराबरको बजेट ल्याउने गृहकार्य गरिएको बताएका छन् ।

उनका अनुसार खानेपानी, कृषि सडक लगायत नागरिकको दैनिक आवश्यकतासँग जोडिएको विषयलाई केन्द्रमा राखेर बजेट ल्याउने नीति बनाइएको बताए ।