अखबार नेपाल ट्रेन्डिङ

काठमाडौं: जनता समाजावदी पार्टी (जसपा) फुटको संघारमा पुगको छ ।

पार्टीको संघीय परिषद अध्यक्ष डा. बाबुराम भट्टराई र पार्टी अध्यक्ष उपेन्द्र यादवबीच अहिले पानी बाराबरको अवस्था सिर्जना भएपछि पार्टी फुटको संघारमा पुगेको हो ।

विशेषतः अलिहे पार्टीभित्र स्थानीय तहको निर्वाचनलाई लिएर विवाद चर्किएको छ ।

यादव पक्षले स्थानीय तहको निर्वाचनका सन्दर्भमा छलफल गर्न केन्द्रीय समितिको बैठक नबोलाएपछि भट्टराईपक्ष रुष्ट हुन पुगेको छ  ।

अध्यक्ष यादवले टिकट बाँड्दा संस्थागत निर्णय नगरेको, सत्ता गठबन्धनसँगको निर्णयमा पार्टीमा परामर्श नगरेको, अर्को अध्यक्षमा वरिष्ठ नेता अशोक राईलाई चयन गर्न अनिच्छा देखाएको आरोप भट्टराई पक्षको छ ।

पार्टीभित्र उत्पन्न असन्तुष्टिका विषयमा छलफल गर्न केन्द्रीय समिति बैठकको माग गर्दै आए पनि अध्यक्ष यादवले बेवास्ता गरेको पनि सो पक्षको भनाई छ ।

जसपाले स्थानीय तहको निर्वाचन समीक्षा जिल्लाबाट संकलन गर्न असार १५ सम्म म्याद तोकेको छ ।

पार्टीभित्र सामूहिक निर्णय गर्न गत फागुन ३० मा केन्द्रीय समितिले संघीय परिषद् अध्यक्ष भट्टराई, कार्यकारिणी अध्यक्ष यादव र वरिष्ठ नेता राई रहेको ‘मुख्यालय’ गठन गरेको थियो ।

तर निर्णय अध्यक्ष यादवले एकलौटी रूपमा गर्दै आएको आरोप लगाइएको छ । भट्टराई पक्षले यादवकै कारण जित्ने क्षेत्र पनि हारेको बताउँदै आएको छ ।

गठबन्धन र चुनावको टिकट वितरणका विषयमा जसपाभित्र ठाउँ-ठाउँमा विवाद भइरहेको छ । धनुषामा मंगलबार भएको चुनावी समीक्षामा दुई पक्षबीच कुटाकुट नै भएको थियो ।