अखबार नेपाल ट्रेन्डिङ

काठमाडौं: नेपाली कांग्रेसको १४औं महाधिवेशन यहि २४ मंसिरदेखि काठमाडौंमा सुरु हुँदैछ ।

स्थानीय तह अन्तर्गत वडा, पालिका, क्षेत्र, जिल्ला र प्रदेशको अधिवेशन सकेपछि कांग्रेसको केन्द्रीय महाधिवेशन हुन लागेको हो ।

कांग्रेसले तल्लो तहदेखि नै सर्वसम्मत र निर्वाचनका माध्यमबाट कार्यसमिति चयन गर्दै आएको छ भने झन्डै आठ हजार कांग्रेसका नेता कार्यकर्ता पार्टीमा नयाँ आइसकेका छन् ।

पहिलो पटक कांग्रेसले प्रदेश संरचनाको अधिवेशन गरेको छ । प्रदेश २ बाहेक ६ वटै प्रदेश कार्यसमिति चयन भइसकेको छ ।

कांग्रेसको केन्द्रीय कार्यसमिति १ सय ३४ सदस्यीय हुनेछ । कोषाध्यक्ष बाहेक सबै निर्वाचित हुनेछन् । कांग्रेस विधानमा प्रवक्ताबारे केही उल्लेख नभए पनि पदाधिकारीकै हैसियत दिइएको छ ।

कोषाध्यक्ष र प्रवक्ता दुवै पदाधिकारी हुनेछन् ।

कांग्रेसमा सभापति, उपसभापति दुई, महामन्त्री दुई, सहमहामन्त्री आठ (खस-आर्य, जनजाति, महिला, मधेसी, मुस्लिम, थारु, दलित र पिछडिएको क्षेत्रबाट एक-एकजना) गरी १३ जना निर्वाचन मार्फत आउने छन् ।

केन्द्रीय सदस्य खुलातर्फ ३५ जना निर्वाचनबाट आउनेछन् । १३औं महाधिवेशनमा खुलातर्फ २५ जना निर्वाचनका माध्यमबाट आएका थिए । यसपटक भने १० जना थपिएको छ ।

सात वटै प्रदेशबाट महिलासहित २१ जना, खुला महिलाबाट ९, खस-आर्यबार्ट ६ महिलासहित १३, आदिवासी जनजातिबाट ७ महिला सहित १५, मधेसीबाट चार महिलासहित ९, दलितबाट ४ महिलासहित ९, थारुबाट २ महिला सहित ४, मुस्लिमबाट १ महिलासहित ४, पिछडिएको क्षेत्रबाट १, अल्पसंख्यकबाट १, अपांगता भएकाबाट १ गरी १ सय ३४ जनाको निर्वाचन हुनेछ ।

केन्द्रीय सभापतिको हकमा १५ वर्ष क्रियाशील सदस्य भएको हुनुपर्ने र बाँकी पदाधिकारी-सदस्यको हकमा १० वर्ष क्रियाशील सदस्यता लिए पुग्नेछ ।