अखबार नेपाल ट्रेन्डिङ

पोर्चुगल: गैरआवासीय नेपाली संघ (एआरएनए) पोर्चुगलका अध्यक्ष तिलक गैरेलाई ट्वान्टी फोर न्युजप्रेस डट कम तथा एपीवान टेलिभिजनको दोश्रो वार्षिकोत्सवको अवसरमा कदर-पत्र प्रदान गरिएको छ ।

प्रवासमा रहेका नेपाली समाजका विविध विषयमा सामाजिक योगदान पुर्‍याएको भन्दै कदर पत्र प्रदान गरिएको एपीवान टेलिभिजनका अन्तर्राष्ट्रिय व्युरो समाचार प्रमुख विनय अधिकारीले बताए । करिब ९ महिना अघि एनआरएन पोर्चुगलको अध्यक्षमा निर्वाचित गैरे पछिल्लो समय विश्वभर फैलिएको कोरोना महामारीबाट प्रभावित नेपालीहरुको सहयोगमा जुटेका छन् । उनले कोरोना भाइरस संक्रमित नेपालीहरुलाई मात्र नभई समस्यामा परेका नेपालीहरुलाई समेत सहयोग गर्दै आइरहेका छन् । एनआरएन पोर्चुगलको अध्यक्षको हैसियतमा मात्र नभई व्यक्तिगत रुपमा पनि उनले आवश्यक सामग्रीहरु वितरण गर्दै आइरहेको बताइएको छ ।

कोरोनाका कारण रोजगारी गुमाएका नेपालीहरुलाई अवसरको खोजी गरेर रोजगारी दिलाउने काम एनआरएनले गर्ने पोर्चुगलका अध्यक्ष गैरेले बताए । ‘कोरोनाका कारण होटल, रेष्टुरेण्टमा कार्यरत नेपालीहरुको रोजगारी गुमेको छ । हामीले अवसरको खोजी गरेर काममा लगाउने कार्य गरिरहेका छौं,’ उनले भने, ‘प्रवासमा रहेका नेपालीहरुले कुनै पनि समस्या भोग्न नपरोस् भन्नेमा एनआरएन पोर्चुगल सचेत छ र त्यसमा सक्रिय भएर लागेका पनि छौं ।’

यसअघि पनि एनआरएन पोर्चुगलले विभिन्न कारणले जेलमा परेका नेपालीको उद्दार तथा रोजगारीको सिलसिलामा ज्यान गुमाएका मृतकका परिवारलाई सहयोग गर्दै आइरहेको छ । त्यस्तै अध्यक्ष गैरेले म्याग्दीको देविस्थान गाउँपालिका घर भई एक वर्षदेखि चार महिनाको बच्चासहित पोर्चुगल अलेन्तेजो जोनको साउतोतोनियो बस्दै आएकी दिवानी पुर्जालाई व्यक्तिगत रूपमा नगद सहयोग प्रदान गरेका छन् । पुर्जाको श्रीमान भने हाल नेपालमै भएको र काम पनि नभएका कारण आर्थिक कठिनाई परिरहेको थाहा पाएपछि अध्यक्ष गैरे उनको निवासमा पुगेर घरभाडा लगायत अन्य आवश्यक नगद सहयोग प्रदान गरेका हुन् ।

अध्यक्ष गैरेले नेपाल र नेपालीहरुका लागि महत्वकांक्षी योजनाहरु अघि सारेको भएपनि कोरोनाका कारण ती योजनाहरु अलपत्र परेको बताए । नेपालीहरुको समस्या समाधान गर्न एनआरएन पोर्चुगलले हेल्प डेस्क र नेपाली संस्कृती झल्काउने खालको संग्रहालय नेपाल हाउसको स्थापना गर्न कोरोनाका कारण रोकिएको छ । कोरोना संक्रमणको जोखिम कम भई स्थिति सामान्य भएपछि ती कामहरु शुरु हुने पनि उनले जानकारी दिए ।