अखबार नेपाल ट्रेन्डिङ

रौतहट: पार्टी एकतापछि सत्तारुढ दल नेपाल कम्युनिष्ट पार्टीले प्रदेश नम्बर २ को रौतहटमा पहिलो पटक सभाको आयोजना गरेको छ । रौतहटको गरुडामा आयोजित सभामा पार्टी अध्यक्ष एवं प्रधानमन्त्री केपी शर्मा ओलीले प्रदेश-२ को बिकासमा संघीय सरकार सक्रिय भएर लागेको बताउनुभयो ।

प्रदेश सरकारको बेटी बचाऔं, बेटी पढाऔं अभियानको प्रशंसा गर्दै प्रधानमन्त्री ओलीले मधेशको बिकास तथा समृद्धिको अभियानमा हातेमालो गर्न आग्रह गर्नुभयो । प्रधानमन्त्री ओलीले मधेश केन्द्रित दलहरुलाई लक्षित गर्दै जनतालार्इ एकपटक झुक्याएर भोट पाइयो भन्दैमा नमात्तिन आग्रह गर्नुभयो ।

उहाँले छुट्टै मधेशको माग राख्नेहरु मुलधारको राजनीतिमा आउनु स्वागतयोग्य रहेकोसमेत बताउनुभयो । पार्टी एकताका विषयमा ओलीले छिट्टै तल्लो तहसम्मको एकता हुने भन्दै नेता तथा कार्यकर्तालाइ ढुक्क हुन आग्रह समेत गर्नुभयो ।

सभामा नेकपा अध्यक्ष पुष्पकमल दाहालले मधेशका जनताले लोकतन्त्र ल्याउन बिभिन्न समयको आन्दोलनमा बलिदानी दिएको स्मरण गर्दै जनतालार्इ अधिकार सम्पन्न बनाउन कानून निर्माण भैरहेको बताउनुभयो । उहाँले पहिलेको शासकले मधेशलाइ बिभेद गरेको र वर्तमान सरकार बिशेष प्याकेज लिएर मधेशको बिकासमा लागिपरेको दावी गर्नुभयो ।

सभामा बरिष्ठ नेता माधवकुमार नेपालले मधेशको बिकासका लागि दीर्घकालिन योजना संचालन गर्दै आएको बताउनुभयो । रौतहट जिल्ला कम्युनिष्ट आन्दोलनको इतिहास बोकेको जिल्ला रहेको स्मरण गर्दै किसान आन्दोलनको शुरुवात पनि रौतहटबाट भएको नेता नेपालले सो अवसरमा स्मरण गर्नुभयो ।